Víctor Coyote tiende puentes entre Galicia y América en el Outono Códax

O festival Outono Códax, recoñecido pola súa atención ás músicas de raíz norteamericanas, amplía este ano o seu foco para explorar as conexións sonoras con América Central e do Sur. Unha liña que atopará o seu momento máis evidente este mércores 12 coa actuación de Víctor Coyote, artista tudense considerado unha das figuras máis inclasificables e poliédricas da cultura española contemporánea.

O concerto, que terá lugar no Riquela Club de Santiago coa apertura de portas ás 20:30 horas, contará cun formato de trío, no que Coyote estará acompañado por Gustavo Villamor e Ricardo Moreno. Sobre o escenario, o músico promete afondar na súa personalísima linguaxe musical, afastándose da rigidez rítmica que, ao seu xuízo, marcou a evolución do rock, e reivindicando os vínculos históricos de Galicia coa cumbia, o merengue e as músicas de Porto Rico, Brasil ou Venezuela.

A traxectoria de Coyote —nacido en Tui en 1959— arrinca nos anos oitenta, cando se converteu en referente da movida madrileña á fronte de Los Coyotes, formación pioneira na fusión de rock, ritmos fronteirizos e ecos latinos. Tras a súa disolución en 1992, o artista desenvolveu unha carreira marcada pola independencia creativa, a experimentación formal e unha constante renovación estética. Músico, ilustrador, deseñador gráfico e escritor, o seu universo creativo mestura tradición popular e vangarda, territorio local e visión global, ironía e crítica social.

Para esta cita compostelá, Coyote contará cun convidado de excepción: o músico Javi Álvarez, integrante de proxectos como Fluzo, Néboa ou Dúo Cobra, recoñecido pola súa capacidade para dinamitar etiquetas a través dunha mestura inclasificable de psychobilly, electrónica vintage, desvarío punk e humor musical de precisión quirúrxica. “Cando se unen tradición con tradición e experimentación con experimentación, ninguén pode permanecer indiferente”, advirte Coyote.

Un artista total tamén sobre o papel

O protagonismo de Víctor Coyote no Outono Códax non remata no escenario. Antes do concerto, ás 19:00 horas, inaugurará en A Reixa-Matrioska (Rúa do Hórreo, 46) unha exposición de pósters e ilustracións de riders escénicos, unha mostra que permanecerá aberta durante todo o mes de novembro. A exhibición achega outra faceta sobranceira do artista, que leva décadas desenvolvendo un imaxinario visual propio, recoñecible e coherente.