De Ninghures estreará ‘O Último Baile’ o 17 de xaneiro, un tema visceral e escuro no seu novo disco

O terceiro sinxelo do novo disco da banda, considerado a peza «máis escura e visceral» das creadas até agora, estará dispoñible nas plataformas dixitais desde as 00:00 horas do venres 17 de xaneiro.

A escuridade chega co terceiro adianto do esperado novo disco de De Ninghures. O venres 17 de xaneiro, ás 00:00 horas, publicarase «O Último Baile», un tema que se destaca pola súa sonoridade máis visceral e agresiva. Esta peza é o terceiro sinxelo de avance do novo álbum de estudio da banda, que será producido por Juan de Dios Martín e sairá á luz nas próximas semanas.

«O Último Baile» ten como base unha copla recollida en 1979 en Arzúa por Dorothé Schubarth á informante Salomé, un arquivo que se atopa no APOI (Arquivo do Patrimonio Oral da Identidade). A partir desta copla da tradición popular, a banda teceu os seus propios versos e música, creando unha canción que fala do mal amor, ese tipo de relacións que «se che meten na cabeza e que nos consumen». A súa letra acompáñase dunha instrumentación escura, hipnótica, cunha sonoridade agresiva que medra en espirais, crecendo até formar un bucle, «como se fora unha obsesión que te consume e te destrúe á vez», comentan os membros do grupo.

De Ninghures: unha banda con raízs e mirada aberta ao mundo

De Ninghures é unha das bandas máis destacadas da actual escena galega, mesturando música tradicional galega con influencias de diversas culturas, como a latinoamericana ou a magrebí. A súa proposta sorprende por combinar mestría musical e unha actitude desenfadada, destacando pola súa capacidade para mesturar voces e actualizar melodías populares. A banda consegue, con cada canción, facer que o público baile e se emocione ao mesmo tempo.

En 2022, De Ninghures publicou «Aquí», o seu primeiro álbum, e despois de máis de medio centenar de concertos e varios sinxelos de éxito como «Morena», galardoado como Mellor Música do Ano nos Premios Ari(t)mar, ou a enérxica muiñeira «Poço», o grupo galego está a punto de presentar o seu novo traballo a comezos de 2025, do que xa se coñecen os sinxelos «Corazón Alionado» e «A Burriña».