Las Migas, recentes gañadoras dun Latin Grammy, actuarán na Coruña o próximo 30 de novembro

Las Migas aterrarán dende Miami coa súa xira estatal no Teatro Colón da Coruña tras recibir o seu segundo Latin Grammy. Será o próximo domingo 30 de novembro, e as súas entradas están xa dispoñibles en entradas.ataquilla.com.

A xa considerada como unha das formacións máis exitosas e influentes do flamenco nos últimos anos trasladará ao directo o seu disco «Flamencas», co que acadaron o seu segundo Latin Grammy a «Mellor Álbum de Música Flamenca», xunto a algúns dos temas que marcaron a súa carreira.

Tras 20 anos sobre as táboas, nos que se alzaron con, precisamente, dous Latin Grammy e colleitaron ata 4 nominacións aos mesmos, o cuarteto emprende a súa xira de teatros e auditorios tras o lanzamento do seu novo álbum.

Seis discos de estudo, concertos en máis de 50 países e galardóns como dous Premios MIN ou un Premio +Músicas amparan unha das carreiras máis destacadas dentro do xénero.

O grupo composto por Paula Ramírez (voz), Marta Robles (guitarra e voz), Alicia Grillo (guitarra e voz) e Laura Pacios (violín e voz) continúa amosando que o flamenco ten novas voces, novas formas e unha enerxía feminina capaz de transcender fronteiras.

«Flamencas», novo traballo discográfico, supón un vibrante regreso á orixe máis pura e tradicional do xénero, sen deixar atrás a personalidade e frescura que as consolidou como unha das propostas máis destacadas e recoñecidas do flamenco contemporáneo a nivel internacional.

Este novo traballo configúrase como unha evolución da súa linguaxe: unha homenaxe á pureza do flamenco, interpretado dende unha ollada fresca, libre, contemporánea e empoderada.

Cante, toque e compás conviven con arranxos coidados e unha sensibilidade moderna, ademais dunhas poderosas letras onde o cuarteto intenta derrubar estereotipos clásicos masculinos do flamenco cunha proposta en directo cun demoledor discurso visual, que buscará arrincar as ovacións do público coruñés.

En paralelo ao éxito discográfico, Las Migas continúan coa súa xira internacional Flamencas Tour, que durante 2025 percorreu escenarios de Europa, África e Asia, con paradas en Londres, Túnez, Suíza, Turquía, Bulgaria ou Emiratos Árabes Unidos, ademais dos principais teatros e festivais españoles como o Palau de la Música Catalana no Festival de Jazz de Barcelona, La Rambleta de Valencia ou o Gran Teatro Príncipe Pío de Madrid. En 2026 a xira seguirá dando a volta ao mundo coas tours en Estados Unidos, Europa e América Latina.