A Xunta promove o concerto de Baiuca en Bos Aires como referente da vangarda musical galega e da conexión cultural coas novas xeracións da diáspora

A Xunta de Galicia impulsou en Bos Aires o concerto musical de Baiuca no marco da iniciativa pioneira Saborea Galicia Calidade, celebrada na capital arxentina aproveitando a visibilidade que outorga a Galicia a súa condición de rexión convidada de honra pola Embaixada de España no país con motivo da celebración do Día da Hispanidade (12 de outubro).

A este concerto, que tivo lugar esta pasada noite na sala Groove —e ao que asistiron o conselleiro de Emprego, Comercio e Emigración, José González, acompañado polo secretario xeral da Emigración, Antonio Rodríguez Miranda, e polo delegado da Xunta na Arxentina, Alejandro López Dobarro— sumarase o previsto da recoñecida artista Luz Casal —que actuará o día 12 no centro cultural Palacio Libertad— e complementa as catas celebradas o xoves no hotel Grand Brizo, a cargo do chef galego Manolo Costiña, do restaurante Retiro da Costiña (Santa Comba, A Coruña). Estas actividades estiveron dirixidas a público especializado co obxectivo de contribuír á visibilidade e internacionalización do bo facer da cociña galega.

Baiuca, proxecto musical de Alejandro Guillán Castaño, combina a tradición sonora galega coa música electrónica contemporánea, reinterpretando a cultura do país desde unha perspectiva vangardista e achegándoa a novos públicos nun dos escenarios máis significativos da diáspora galega. O conselleiro José González destacou a súa capacidade para achegarse a novos públicos, reinventar a cultura galega sen perder as raíces e representar a vangarda e a nova galeguidade.

Galicia, convidada de honra da Embaixada de España

Previo á actuación de Baiuca, tivo lugar o acto institucional da Embaixada de España na sede da chancelería, con Galicia como comunidade convidada. Deste xeito, a programación de Saborea Galicia Calidade aproveita a proxección internacional deste fito para reforzar a presenza de Galicia no exterior e xerar novas oportunidades de colaboración económica e cultural, consolidando ao mesmo tempo a imaxe da comunidade como unha rexión aberta, innovadora e competitiva no ámbito global.