O departamento de Xuventude está a promover unhas xornadas de sensibilización sobre as tecnoadiccións dirixidas ás familias, co obxectivo de ofrecer ferramentas e claves para a educación das crianzas no uso responsable dos dispositivos dixitais. A concelleira de Dereitos e Servizos Sociais, Promoción Económica e Xuventude destacou que «existen numerosos estudos que alertan sobre a crecente adicción ás pantallas na infancia e adolescencia, polo que as administracións públicas deben implicarse para frear esta tendencia».
Este ciclo de charlas, iniciado o pasado mes de novembro, súmase a outras accións desenvolvidas polo departamento de Mocidade, especialmente centradas en actividades nos centros educativos.
CONFERENCIA ABERTA EN CORNES
A próxima charla terá lugar o mércores ás 18:30 horas na Casa das Asociacións de Cornes, con entrada libre e de balde. Estará impartida por Anabel Mosquera, pedagoga especializada na prevención de condutas de risco en menores e con ampla experiencia no desenvolvemento de programas educativos dirixidos a nenos, nenas e ás súas familias.
Durante a sesión, Mosquera abordará os riscos asociados a unha exposición excesiva ou insegura ás pantallas e ofrecerá pautas para axudar ás familias a establecer límites e orientacións que favorezan un uso máis seguro e saudable das tecnoloxías.
