Santiago impulsa un plan de formación gratuíto en seguridade alimentaria e facturación electrónica para o sector hostaleiro

O Concello de Santiago, a través da Concellaría de Promoción Económica, lanzou un ambicioso plan de formación destinado a apoiar a modernización e mellorar a competitividade das empresas hostaleiras da cidade. O programa, presentado pola concelleira de Dereitos e Servizos Sociais, Promoción Económica e Xuventude, María Rozas, céntrase en dúas áreas clave: a seguridade alimentaria e a transformación dixital.

Durante a rolda de prensa de presentación, María Rozas destacou que o obxectivo é “fortalecer a competitividade e a calidade das pemes e microempresas da hostalería, un sector fundamental para a economía local que emprega a case 1.300 persoas”. Na presentación estivo tamén o presidente da asociación Hostalaria.gal, Lois Lopes, e Eduardo Troncoso, experto en seguridade alimentaria e representante da empresa encargada da formación.

Facturación electrónica e Regulamento Verifactu

Un dos eixos principais do programa é a adaptación ao Regulamento Verifactu, aprobado no Real Decreto 1007/2023, que fixou a obrigatoriedade da facturación electrónica para todas as empresas. Este cambio, que rematou o pasado xullo, transforma a xestión documental e financeira, resultando especialmente desafiante para pemes e microempresas.

A formación permitirá aos profesionais da hostalería coñecer as obrigas legais, manexar a plataforma Verifactu e aproveitar as oportunidades que a dixitalización ofrece aos seus negocios. As sesións serán presenciais no edificio Cersia de San Lázaro, con grupos reducidos de cinco persoas e varias quendas de mañá e tarde para facilitar a participación.

Calidade e seguridade alimentaria

Outro eixo do plan céntrase na mellora da calidade e seguridade alimentaria mediante a implantación do sistema de Análise de Perigos e Puntos Críticos de Control (APPCC), esencial para cumprir a normativa sanitaria e previr riscos para a saúde pública. Ademais, inclúese formación sobre a Lei de prevención das perdas e desperdicio alimentario, aprobada en abril deste ano.

O programa ofrecerá asesoramento individualizado, adaptado ás características de cada establecemento, garantindo a correcta aplicación das medidas e mellorando a calidade do servizo. Eduardo Troncoso subliñou a importancia de concienciar ao sector sobre a redución do desperdicio alimentario, non só por motivos de sostibilidade ambiental, senón tamén de eficiencia económica, promovendo a reutilización de excedentes e o aproveitamento responsable dos alimentos.

Gratuíto e aberto ata novembro

Todas as actividades do plan son gratuítas, e o prazo de inscrición permanecerá aberto ata o 7 de novembro. As persoas interesadas poden inscribirse a través deste formulario, ou solicitar información adicional mediante o correo asociacion@hostalaria.gal ou o teléfono 881 947 223.