Perdomo e Touriñán, este domingo en Santiago con ‘Corentena’, o seu novo show

David Perdomo e Xosé A. Touriñán aterrizan este domingo 26 na capital compostelá con Corentena, un espectáculo que ten a súa orixe nuns meses de confinamento, en 2020, nos que os humoristas comezaron a conversar en directo a través de Instagram. Naquelas noites, improvisaban diferentes personaxes e interactuaban cos espectadores que se conectaban a estes vídeos en directo.

Catro anos despois ambos dan o salto aos escenarios nun formato no que «pretenden pasalo tan ben ou mellor que o público trasladando aos teatros a frescura daquelas noites de comedia».

Así, en Corentena, os dous cómicos rescatan algúns dos personaxes recorrentes daqueles directos, recreando de xeito artesanal os efectos e filtros cos que se caracterizaban, e tamén nacen novas historias nun espectáculo no que a improvisación e a complicidade co público son as protagonistas.

A cita terá lugar mañá ás 20,00 horas no Auditorio de Galicia, aínda que segundo a web do propio espectáculo, as entradas xa se atopan esgotadas.