ONGs reúnense para dar conta dos seus proxectos impulsados polo Concello

Como parte de ‘Compostela máis solidaria’, un evento que busca crear conciencia sobre as realidades das persoas migrantes na nosa comunidade, a capital galega acollerá toda unha serie de actividades que arrancan este mesmo mércores cun encontro con ONGs que están a desenvolver diferentes proxectos apoiados polo Concello de Santiago, a través da súa liña de subvencións á cooperación ao desenvolvemento.

Esta actividade, que leva por lema «Compostela co Sur Global», terá lugar no edificio Cersia de San Lázaro a partir das 16:30 horas, e contará coa participación da Asamblea de Cooperación pola Paz, e a súa socia REDES de O Salvador; Solidariedade Internacional e a súa socia Siembra, de Guatemala; Arquitectura sen Fronteiras, a Fundación Vicente Ferrer, SED e PROYDE.

«‘Compostela máis solidaria’ é unha proposta de sensibilización arredor das realidades migrantes que forman parte da nosa contorna e das que, como sociedade, non sempre somos conscientes. Nesta edición, o programa pón o foco na necesidade de termos información veraz e de primeira man fronte aos bulos, que no que tén que ver coa cooperación e a poboación migrante adoitan traducirse en máis intolerancia», destacou o Concello a través dun comunicado, no que tamén destaca que este «foi pioneiro en 2016 na convocatoria dunha liña de subvencións de cooperación, e para este ano a Concellaría de Dereitos e Servizos Sociais prevé destinar un orzamento de 300.000 euros á nova convocatoria de axuda».