O IGFAE conmemora os 100 anos da mecánica cuántica cun programa multidisciplinar na súa Semana da Ciencia

O Instituto Galego de Física de Altas Enerxías (IGFAE), centro mixto da USC e da Xunta de Galicia, celebra do 8 ao 14 de novembro a oitava edición da súa Semana da Ciencia, centrada este ano no centenario da mecánica cuántica e no Ano Internacional da Ciencia e Tecnoloxía Cuánticas. O programa ofrece achegamentos á física cuántica desde múltiples disciplinas, incluíndo maxia, música jazz e danza contemporánea, e ten como acto central a conferencia da física compostelá Antía Lamas Liñares.

A Semana dará comezo o sábado 8 coa xornada de portas abertas Ciencia Singular, organizada polos cinco centros da rede CIGUS da USC: CiQUS, CiMUS, CiTIUS, IGFAE e CRETUS.

Antía Lamas Liñares: A segunda revolución cuántica

A conferencia principal terá lugar o martes 11 de novembro ás 20.00 horas na Casa das Máquinas (Rúa das Galeras, s/n) e leva por título “A segunda revolución cuántica: o camiño dende a ciencia á enxeñaría”. Lamas Liñares, científica cuántica principal en Amazon Web Services e formada na USC, Imperial College London e Universidade de Oxford, abordará as oportunidades tecnolóxicas que ofrece, un século despois, o desenvolvemento da mecánica cuántica.

Antes da súa charla, ás 19.00 horas, celebrarase o espectáculo de maxia “A baralla cuántica: percepción, información e realidade”, no que o investigador do IGFAE Javier Mas e o mago Kiko Pastur explorarán, mediante ilusionismo, os principios cuánticos e a súa influencia na percepción humana.

Música e física: Sumrrá e a experiencia cuántica

O mércores 12 de novembro, o auditorio do Centro Galego de Arte Contemporánea acollerá o concerto de Sumrrá, que interpretará pezas do seu álbum 7 Visións xunto cunha composición inédita, A oitava visión. O zoom cuántico, inspirada na transición da física clásica á cuántica. A iniciativa conta co apoio do Centro de Supercomputación de Galicia (CESGA) e o propio IGFAE.

Wikimaratón, NerdNite e danza contemporánea

Entre as actividades complementarias destacan a primeira edición do Wikimaratón de Física de Partículas (xoves 13, 15.30 horas), dirixido a persoal do IGFAE, estudantes de Física da USC e público interesado, coa creación de contido en galego para Wikipedia. A NerdNite (xoves 13, 20.30 horas) achegará a cuántica desde os reloxos cuánticos, a supercondutividade e os efectos dos raios cósmicos na computación cuántica.

A Semana pecharase o venres 14 cun obradoiro de danza contemporánea inspirado en principios cuánticos, coordinado polo investigador do IGFAE Héctor Álvarez e a artista Paula Quintas, destinado a artistas, bailaríns e curiosos, e limitado a 25 participantes.