O 12 CO(M)XÉNERO aborda a invisibilidade das traballadoras de coidados en Santiago

Compostela acollerá os días 4 e 5 de novembro a duodécima edición do CO(M)XÉNERO, o seminario organizado polo Seminario Permanente de Comunicación e Xénero da Facultade de Ciencias da Comunicación da USC. Baixo o título “A brigada invisible. Kellys, criadas e internas saen a escena”, o evento pretende visibilizar unha das múltiples violencias que sofren as mulleres asociadas ao traballo mal remunerado dos coidados, a través das súas representacións e silencios na cultura audiovisual.

O programa dará comezo o 4 de novembro ás 16.30 horas coa intervención de Vania Arana e Georgina Cisquella, e estenderase durante toda a xornada do día 5. A inscrición é gratuíta e pode formalizarse ata o 31 de outubro mediante un formulario en liña.

Segundo explican desde o Grupo de Estudos Audiovisuais da USC, “o corpo e a vida das traballadoras queda oculto tras as habitacións de hotel limpas, as casas de luxo en orde ou as porterías diminutas”. Este colectivo, maioritariamente feminino e migrante, representa case o 4% dos empregos en España, unha cifra superior á dos sectores da construción ou das finanzas. Con todo, os seus dereitos laborais non están equiparados co resto de traballadores e a súa presenza no cinema documental raramente transcende os tópicos.

O 12 CO(M)XÉNERO propón achegar outras perspectivas sobre este traballo case exclusivamente feminizado, explorando formatos que van do documental ao experimental, pasando polo militante e o híbrido, segundo matizan desde Estudos Audiovisuais.

A actividade está aberta ao público en xeral, aínda que está especialmente dirixida a profesionais e investigadores do ámbito da comunicación, estudantes do Programa de Doutoramento en Comunicación e Información Contemporáneas e alumnos dos graos en Comunicación Audiovisual e Xornalismo.