Minuto de silencio no Obradoiro pola última vítima mortal de violencia machista

A compostelá praza do Obradoiro acolleu este mediodía un minuto de silencio pola muller asasinada o pasado 28 de agosto en Sevilla, sendo vítima de violencia de xénero.

Membros da Corporación e tamén persoal do Concello participaron neste acto, no que se gardou un minuto de silencio en recordo da muller asasinada. Volveu así darse cumprimento á moción aprobada por unanimidade no Pleno da Corporación do 7 de setembro de 2015, que fixa accións de dó e solidariedade por cada asasinato machista.

«A violencia de xénero é a expresión máis extrema da desigualdade social que sofren as mulleres, e estes asasinatos prodúcense porque a violencia segue sendo utilizada como un mecanismo de control e dominación das mulleres», sinalan dende Raxoi, que, xunto co conxunto da Corporación, condenan firmemente a violencia de xénero, e queren amosar a súa máxima solidariedade coas familias de todas as mulleres asasinadas.