Marta Lois, elixida nova decana da Facultade de Políticas

Marta Lois, ex portavoz de Sumar no Congreso e que abandonou a primeira liña política tras quedar sen representación nas eleccións galegas do pasado 18 de febreiro nas que foi candidata, foi elixida nova decana da Facultade de Ciencias Políticas da Universidade de Santiago de Compostela (USC).

Esta, que retomou o seu traballo na Universidade de Santiago o pasado mes de febreiro aínda que segue formando parte do proxecto político de Yolanda Díaz,  estará acompañada por un equipo “plural e integrador”, segundo destacou ela mesma, composto por José Caamaño (Economía Política), Amparo Novo (Socioloxía) e Alba Alonso (Ciencia Política), sucedendo así no cargo ao profesor Ramón Bouzas tras unha elección que tivo lugar este venres e na que a candidatura de Lois obtivo 20 votos, fronte aos 10 da profesora Erika Jaráiz Gulías.

Lois é doutora en Ciencia Política e docente no Departamento de Ciencia Política e Socioloxía, ademais de formar parte da Rede Armela de investigación en igualdade, dereitos e estado social. O seu traballo investigador céntrase na perspectiva de xénero, a análise das políticas públicas e a teoría política feminista, con numerosas publicacións en revistas e libros de prestixio. Entre os seus traballos destacados atópanse estudios sobre o impacto das cotas de xénero nos gobernos autonómicos e o papel das mulleres nos parlamentos.

A nova decana é tamén coautora de obras de referencia como Crisis, derechos sociales e igualdad e Ciencia política con perspectiva de género, esta última galardoada co Premio María Ángeles Durán de Investigación Científica.