Laboratorios Ozoaqua se suma ao proxecto da SD Compostela

Laboratorios Ozoaqua, pertencente ao Grupo Quatrium, vén de converterse en novo patrocinador oficial da SD Compostela para a tempada 2024/25. A firma compostelá, recoñecida a nivel nacional e internacional polo seu labor en dermatoloxía grazas aos seus aceites ozonizados, contribuirá ao coidado da pel dos xogadores do club durante esta campaña. Ademais de ter unha presenza importante nos espazos publicitarios do equipo, Ozoaqua será o provedor oficial de produtos dermatolóxicos para os xogadores.

Os produtos de Ozoaqua, especialmente deseñados para tratar peles sensibles e afeccións cutáneas derivadas da práctica deportiva, garantirán que os futbolistas da SD Compostela teñan acceso aos mellores tratamentos para manter a súa saúde cutánea en perfectas condicións. Estes aceites ozonizados, grazas ás súas propiedades rexenerantes, antioxidantes, calmantes e hidratantes, resultan especialmente efectivos para coidar a pel que sofre agresións externas, exposición prolongada ao sol ou deshidratación.

Miguel Fernández, xerente da SD Compostela, destacou o orgullo que supón para o club contar cun patrocinador como Ozoaqua, subliñando os logros que a empresa ten acadado grazas aos seus produtos. Fernández sinalou que estes aceites ozonizados, líderes no seu sector, ofrecen grandes beneficios para a pel e melloran a calidade de vida dos pacientes que os usan.

A colaboración non só apoia ao equipo, senón que tamén fortalece a posición de Ozoaqua, que actualmente se atopa nun proceso de expansión internacional, levando a marca galega a novos mercados.

En sinal deste compromiso, a sede de Ozoaqua en Santiago acolleu a presentación de dous dos novos fichaxes da SD Compostela para esta tempada, Fer Cano e Carlos Cinta. Durante o acto, estiveron acompañados por Fernando Pais, Director Xeral do Grupo Quatrium, e polo dermatólogo e Director Médico de Ozoaqua, Juanjo Andrés Lencina, quen lles explicaron as propiedades dos principais produtos da marca.

Fernando Pais salientou a importancia desta colaboración, que cumpre un dobre obxectivo: apoiar un club histórico coma o Compostela e, ao mesmo tempo, mellorar a saúde cutánea dos seus xogadores. Pais tamén agradeceu á directiva do club por apostar polos produtos de Laboratorios Ozoaqua e expresou os seus mellores desexos para ambas marcas nesta nova tempada.