Inicia a construción dun sistema de drenaxe urbana no Polígono do Tambre

O proxecto europeo WATERUN continúa avanzando en Santiago coa posta en marcha das obras para a construción dun innovador sistema de drenaxe urbana no Polígono do Tambre. Esta iniciativa, que busca xestionar a auga de escorras de forma eficiente e sostible, conta coa colaboración do Concello de Santiago e da Asociación Área Empresarial do Tambre, ademais de Viaqua, que participa activamente no proxecto.

A partir de principios de setembro, iniciarase a construción dun sistema de drenaxe urbana sostible (SuDS) no Vial de Ptolomeo. Este sistema, segundo explica Sergio Santorio, xestor do proxecto, consiste nunha unidade de filtración activa composta por capas de area, grava e unha superficie de fitotratamento. A auga de escorras permea estas capas, permitindo a retención de contaminantes como hidrocarburos, microplásticos e outras partículas. «Trátase dun sistema descentralizado que evita a contaminación das masas de auga próximas, cun baixo custo de mantemento e un impacto ambiental reducido, xa que non require enerxía eléctrica nin adición de reactivos para a depuración», sinala Santorio.

Durante a execución das obras, será necesario cortar o tráfico de dous carrís: un na rúa Vía Edison e outro no Vial de Ptolomeo. Isto impedirá a circulación de vehículos en dirección de entrada desde Vía Edison a Vía Ptolomeo, garantindo así a seguridade durante o desenvolvemento dos traballos.

O proxecto WATERUN, enmarcado no programa Horizon Europe, conta cun orzamento total de 3,9 millóns de euros e inclúe a participación de 14 entidades de 8 países. Entre os socios do proxecto figuran Aimen (España), Universidade da Coruña (España), Dublin City University (Irlanda), Technische Universität Berlin (Alemaña), Helmholtz Zentrum für Umweltforschung (Alemaña), Università Politecnica delle Marche (Italia), Aarhus Universitet (Dinamarca), Viaqua Xestión Integral de Augas de Galicia SAU (España), Tilia Gamba (Alemaña), Office International De L’Eau (Francia), Wareg – European Water Regulators (Italia), University of Jordan (Xordania), Aarhus Vand A/S (Dinamarca) e Seecon (Suíza).

Recentemente, no marco desta iniciativa tamén se instalou un sistema de drenaxe urbana sostible no polígono da Sionlla e estase a traballar na implementación dun humidal de tratamento da auga de escorras nesta zona. Estas accións son parte do compromiso do proxecto para mellorar a xestión da auga de escorras e minimizar o impacto ambiental asociado á súa contención e tratamento.