Borja Verea pídelle ao conselleiro de Facenda que a Xunta teña unha especial sensibilidade no incremento do Estatuto da Capitalidade

O líder do Partido Popular de Santiago, Borja Verea, asegurou hoxe que “está convencido de que, nos orzamentos para 2026, o goberno galego terá unha especial sensibilidade no incremento do Estatuto da Capitalidade”.

“Fronte ao mercadeo de cifras irresponsables feitas polo goberno de BNG e CA, o presidente dos populares composteláns trasladoulle onte ao conselleiro de Facenda “que, seguir mantendo o compromiso con Santiago significa tamén manter o compromiso con Galicia” e pediulle, que fronte a un goberno local paralizado e superado, sexa a administración autonómica quen “marque a diferencia na cidade, como xa vén facendo e, que mellor oportunidade, que mellorando a cifra do Estatuto da Capitalidade”.

O tamén parlamentario popular lembrou que “o incremento do Estatuto de Capitalidade o pasado ano tivo a maior subida dos últimos quince anos, crecendo por riba do propio orzamento autonómico, a pesar dos pedimentos irresponsables de BNG e CA, que só buscan o enfrontamento e a “bronca pola bronca”.

Acabamos de velo nas últimas horas, cando quedou demostrado que “o goberno de BNG e CA é o único incapaz de ceder terreos para construír vivenda pública, poñendo por diante os seus intereses partidistas, aos intereses de todos os santiagueses que buscan vivenda”, destacou.

“A suba do Estatuto da Capitalidade, iniciada o ano pasado, é o recoñecemento dunha administración, a autonómica, liderada por Alfonso Rueda, que ten clara a folla de ruta, o interese xeral e o valor da nosa cidade como capital de Galicia, pero non só unha capitalidade legal senón, sobre todo, unha capitalidade sentimental e a importancia de ser a cidade de todos os galegos”, destacou o tamén deputado popular.