Directivos de empresas do Tambre formaranse en transformación dixital e IA cun programa da escola Galicia Business School para potenciar a competitividade dos seus negocios

A Asociación Área Empresarial do Tambre ofrece aos seus asociados a posibilidade de participar no ‘Programa Xeración Dixital PEMES: Equipos Directivos’ da Galicia Business School.

Este programa, de carácter gratuíto, está dirixido a directivos, profesionais e autónomos que buscan afrontar os desafíos da era dixital e potenciar a competitividade dos seus negocios. Está orientado a que cada participante poida desenvolver un Plan de Transformación Dixital personalizado para a súa empresa ou proxecto, recibindo acompañamento individualizado por parte de expertos da escola, que lles proporcionarán as ferramentas e coñecementos necesarios para abordar este proceso nas súas empresas de maneira eficiente e efectiva.

A formación combina 5 sesións presenciais e 24 online durante tres meses nos que se impartirán 146 horas –136 horas de clases grupais e 10 horas de mentorización personalizada–. As clases presenciais promoven o intercambio de coñecemento e experiencias entre profesionais de toda Galicia e celebraranse a partir de febreiro no Centro de Servizos Innovadores para Empresas Biotecnolóxicas do Biopolo Sionlla, en Santiago de Compostela. As sesións online aportan flexibilidade e facilitan a conciliación coa axenda profesional actual. O programa inclúe tamén análises prácticos de casos reais e talleres específicos para impulsar a dixitalización dos negocios participantes.

O equipo docente de Galicia Business School, integrado por directivos e profesionais en activo, iniciará as clases o 9 de febreiro. Trataranse áreas clave, ao longo de cinco módulos, como a xestión do cambio, a dixitalización operativa, o márketing dixital e novas tecnoloxías emerxentes, entre elas a intelixencia artificial, blockchain e cloud computing, cunha metodoloxía orientada á aplicación práctica en pemes.

Poderán asistir ata dous representantes por empresa, sendo requisito que as compañías teñan entre 1 e 249 empregados. As prazas asignaranse por rigorosa orde de inscrición ata alcanzar o máximo de 50 participantes O programa é completamente gratuíto e está financiado pola Unión Europea a través dos fondos Next Generation EU e o Plan de Recuperación, Transformación e Resiliencia do Ministerio de Asuntos Económicos e Transformación Dixital. Ao finalizar a formación, entregarase a titulación do propio programa e outro certificado do ‘Programa Experto en IA para a Empresa’, ambos expedidos por Galicia Business School

Galicia Business School é a escola de negocios líder en Galicia e referente na formación directiva, premiada como a mellor formación directiva en 2024 e mellor escola de negocios de España 2022 polo diario La Razón; ranking mellores MBA en 2025, 2024 e 2023, segundo o diario El Mundo; e con múltiples programas directivos no ranking da prestixiosa revista Forbes.

O experto Jesús Corral explicará nunha sesión online como a IA está redefinindo a xestión financeira

No marco do ‘Programa Xeración Dixital PEMES: Equipos Directivos’, a Asociación Área Empresarial do Tambre e Galicia Business School celebrarán este mércores, 3 de decembro, unha webinar gratuíta sobre a revolución da intelixencia artificial aplicada á toma de decisións financeiras, ás 13:00 horas. A sesión online estará impartida polo experto en IA e analítica avanzada Jesús Corral.

A IA converteuse nunha ferramenta que está transformando a xestión financeira. Así, nesta webinar explorarase como aplicar la IA nas áreas de finanzas e control para gañar precisión, eficiencia e visión estratéxica. Corral explicará como as novas plataformas permiten monitorizar en tempo real ingresos e gastos, ofrecendo trazabilidade completa de cada transacción e eliminando zonas cegas nos procesos financeiros. Ademais, fará demostracións prácticas de automatización mediante workflows con ferramentas como Make e modelos GPT capaces de procesar documentos en segundos, reducindo riscos e minimizando o erro humano. Tamén abordará un dos ámbitos con maior impacto na función financeira: a IA Explicable (XAI), que garante que cada decisión automatizada poida auditarse, entenderse e aliñarse cos marcos reguladores actuais.

Jesús Corral López é consultor, docente e experto en intelixencia artificial e analítica avanzada. É socio fundador de Optim Asipu S.L., firma especializada en enxeñaría marítima, e profesor asociado na Universitat Politècnica de Catalunya (UPC), onde imparte materias de estatística e investigación operativa en titulacións de enxeñaría. É enxeñeiro de Camiños, Canles e Portos, e conta ademais cun Máster en Enxeñaría e Xestión Portuaria e un Máster universitario en Estatística e Investigación Operativa. Tras unha sólida carreira en proxectos vinculados a portos, costas e medio ambiente, orientou a súa traxectoria cara o modelado matemático, o machine learning e a optimización de procesos, aplicando analítica avanzada á toma de decisións empresariais.