Creafogar, o primeiro evento efémero de interiorismo con marcas galegas chega a Compostela

Santiago converterase no escenario de Creafogar, un evento pioneiro de interiorismo e deseño que reunirá máis de 150 marcas galegas. Este proxecto, que verá a luz o vindeiro 20 de setembro, foi presentado polas interioristas Almudena Rodríguez (DenaDinteriores) e Beatriz Barril (Spacio-B), ambas adscritas a Artesanía de Galicia, nunha rolda de prensa que contou coa presenza da concelleira de Promoción Económica, María Rozas.

Creafogar, que se desenvolverá na casa situada na Rúa Nova 24 durante 20 días, será un espazo efémero onde destacados profesionais do deseño, a artesanía e a construción galega exhibirán o seu traballo nun ambiente colaborativo. O evento conta co apoio do Concello de Santiago, a Xunta de Galicia, Galicia Calidade, Artesanía de Galicia, Axenda Urbana 2030, a Universidade de Santiago de Compostela (USC) e o programa Woman Emprende.

Na súa intervención, María Rozas subliñou a importancia de Creafogar como proxecto que vai máis alá do interiorismo, ligándose á recuperación do patrimonio arquitectónico: «Compartimos a filosofía de Creafogar e apoiamos a rehabilitación de inmobles en desuso para darlle vida». O Concello de Santiago, ademais, colaborará na organización de mesas de debate sobre temáticas clave como o reto da vivenda, os oficios tradicionais e o mercado de barrio.

Pola súa banda, Santiago Boquete, subdirector xeral de Servizo Público de Emprego de Galicia, destacou o compromiso da Xunta co evento, afirmando que «Creafogar pon en valor a formación e os oficios tradicionais galegos», destacando a súa relevancia para o sector.

Almudena Rodríguez (DenaDinteriores) e Beatriz Barril (Spacio-B), interioristas acreditadas por Artesanía de Galicia, son as encargadas de poñer en marcha esta primeira edición de Creafogar. Con máis de 20 anos de experiencia no sector, deseñarán o interiorismo da vivenda en clave galega, coordinando tamén os diversos creadores e gremios da construción participantes no evento.

Este proxecto supón un punto de encontro para os amantes do deseño e da cultura galega, marcando un antes e un despois no panorama do interiorismo en Galicia.