Concello, Ourives de Compostela e Goberno central abordan o Plan Estratéxico da Ourivería

A concelleira de Dereitos e Servizos Sociais, Promoción Económica e Xuventude, María Rozas, mantivo hoxe un encontro cos representantes da asociación Ourives de Compostela co delegado do Goberno en Galicia para presentarlle as accións do Plan Estratéxico da Ourivería e buscar a colaboración do Executivo estatal.

Nesta reunión revisáronse as accións do Plan Estratéxico da Ourivería, nas que colaboran o Concello a través das concellarías de Promoción Económica e Capital Cultural, a Xunta de Galicia, a Deputación, a Universidade e a asociación Ourives de Compostela. Buscouse a implicación do Goberno de Estado en varias liñas de traballo abertas, especialmente na creación do Centro de Referencia da Ourivería, concebido non só como un espazo expositivo, senón como un centro de transmisión do coñecemento. O delegado do Goberno mostrou interese no proxecto, que ten como obxectivos poñer en valor o oficio e fomentar o relevo xeracional, e trasladará a proposta ao Executivo central para estudar posibles vías de colaboración.

María Rozas, concelleira de Promoción Económica, xunto con Arturo Ouro e Lisardo Núñez da asociación Ourives de Compostela, tamén informaron a Pedro Blanco sobre outras accións vinculadas ao Plan Estratéxico da Ourivería, como a posta en marcha dun plan de análise da autenticidade do acibeche, para garantir a calidade e a orixe do produto.