Charo Rúa, Chago Martínez, Aurora da Freira e Suso do Dezaseis, recoñecidos coas Albas 2025 polo seu legado humano e cultural

O Concello de Santiago vén de distinguir coa Alba de Compostela 2025 a catro persoas cuxa traxectoria profesional e vital está fondamente vinculada á cidade e aos seus valores. As galardoadas e galardoados deste ano son a médica Charo Rúa, o ferreiro Chago Martínez, a cantareira Aurora da Freira e o hostaleiro Suso do Dezaseis, referentes nos seus respectivos ámbitos e auténticos símbolos do espírito compostelán.

O Consello Asesor de Condecoracións aprobou estas distincións por unanimidade, valorando non só o seu percorrido profesional, senón tamén o arraigamento social e a relevancia cultural, patrimonial e social que representan para Santiago.

Charo Rúa, pioneira da medicina aérea

Rosario García Rúa, coñecida como Charo Rúa, está considerada a médica de helicóptero máis veterana do Estado español. Cunha carreira de máis de catro décadas na sanidade, traballou durante 34 anos como médica no helicóptero do 061. Ademais, destacou na docencia e na divulgación especializada, formando a profesionais sanitarios, forzas de seguridade e entidades de voluntariado.

Chago Martínez, gardián da forxa tradicional

Santiago Martínez Otero, ou ‘Chago’, é mestre ferreiro, especialista na forxa de construción e na restauración con técnicas tradicionais hoxe case desaparecidas. O seu labor foi fundamental na conservación do patrimonio compostelán, participando na restauración de elementos en edificios emblemáticos como a Catedral, o Pazo de Raxoi, o Hostal dos Reis Católicos, as fontes de Santiago ou a Colexiata do Sar. Ademais, colabora en iniciativas de formación e divulgación sobre o seu oficio.

Aurora da Freira, voz viva da tradición oral

Pilar Aurora Otero Pérez, coñecida como Aurora da Freira, é cantareira e informante nacida en Grixoa e veciña de San Xoán de Fecha. É unha figura esencial na transmisión da música e das melodías tradicionais, e desempeña un papel clave como informante en traballos de compilación e recollida do patrimonio musical galego. É hoxe unha das grandes referentes compostelás vivas na preservación da poesía popular oral.

Suso do Dezaseis, alma gastronómica e cultural de San Pedro

Xesús Manuel Coba Cascallar, coñecido como Suso do Dezaseis, é o hostaleiro que fundou hai 30 anos a Casa de Xantar O’Dezaseis, no barrio de San Pedro. O seu establecemento converteuse nun espazo de referencia non só pola súa aposta pola cociña tradicional galega de calidade, senón tamén por ser lugar de encontro cultural e social tanto para veciños e veciñas como para visitantes. O seu labor consolidou O’Dezaseis como un dos epicentros gastronómicos e culturais de Compostela.

Coa Alba de Compostela 2025, o Concello quere recoñecer e poñer en valor a achega destas catro persoas á vida social, cultural e patrimonial da cidade, consolidándoas como exemplos do talento, compromiso e identidade de Santiago.