Comeza o XXI Festival Internacional de Cine Curtocircuíto

O Festival Internacional de Cinema Curtocircuíto volve a Santiago de Compostela entre o 1 e o 6 de outubro de 2024, celebrando a súa vixésimo primeira edición cunha programación variada e comprometida, marcada pola igualdade de xénero e unha destacada representación internacional. Durante seis días, Santiago converterase no epicentro de encontro para cineastas, artistas e o público, cunha programación que combina o cinema galego, a creación audiovisual contemporánea, a innovación e os espectáculos en vivo, baixo o fío condutor da temática mariña.

A concelleira de Capital Cultural, Míriam Louzao, presentou esta mañá o programa oficial do festival nunha rolda de prensa. Acompañada por Xosé Penas, deputado de Patrimonio da Deputación da Coruña, Jacobo Sutil, director de AGADIC, e o director artístico de Curtocircuíto, Pela del Álamo, Louzao subliñou o compromiso do festival coa diversidade, mencionando que «máis do 66 % dos filmes seleccionados para as seccións competitivas están dirixidos por mulleres, o que demostra a firme aposta pola igualdade neste evento». Curtocircuíto presentará un total de 42 filmes de 16 países diferentes, dos cales 28 teñen a unha muller na dirección, reflectindo así unha presenza feminina moi destacada.

PROGRAMA

A programación do festival está dividida en tres grandes seccións competitivas: Cosmos, Planeta GZ e Supernova. A sección Cosmos conta cunha selección heteroxénea de 25 películas internacionais que van desde narrativas tradicionais ata pezas abstractas e ensaios fílmicos. Nesta sección poderanse ver filmes de cineastas de renome, como Sandra Schäfer, Rainer Kohlberger, Elena López Riera ou Viv Li, cuxas obras proceden de países tan diversos como Estados Unidos, Xeorxia, Corea do Sur, Bangladesh ou Francia.

A sección Planeta GZ, dedicada ao cinema galego, presenta nove filmes de cineastas como Nela Fraga, Guillermo Cabrera e Sabela Eiriz, que ofrecen unha ollada contemporánea sobre a sociedade e a cultura galega. Mentres tanto, Supernova dará visibilidade ao talento emerxente do cinema galego, con obras de realizadores como Cris Souto, Clara Maseda e Patricia Lleras, cuxa nova linguaxe audiovisual rompe coas convencións tradicionais do cinema.

O festival non só pretende recoñecer o talento cinematográfico, senón tamén fomentar o debate e o intercambio de ideas arredor das novas tendencias no mundo do cinema e as artes visuais. O xurado de Cosmos está composto por cinco profesionais de diversos perfís: Guilherme Blanc, comisario e docente; Peter Taylor, director do Berwick Film Festival; Valeria Mata, antropóloga e escritora; Jara Yáñez, directora da revista Caimán Cuadernos de Cine; e Caroline Maleville, programadora do Festival de Cannes. Pola súa banda, as seccións Planeta GZ e Supernova contarán cun xurado composto pola programadora Catarina Boieiro, a compositora galega Belén Vidal e a creadora e poeta Nuria Vil.

PROPOSTAS E COLABORACIÓNS

Este ano, Curtocircuíto mantén as súas colaboracións habituais coa Universidade de Santiago de Compostela (USC) e a Facultade de Comunicación, destacando a sesión especial Terra, dedicada ao cineasta galego Alberto Gracia. Ademais, o festival introduce unha nova colaboración coa Cátedra Cruz Vermella – USC, unha iniciativa que procura tender pontes entre o cinema e a vida cotiá das persoas, promovendo a reflexión sobre a diversidade e a inclusión. Este marco inaugura o Premio Especial Cátedra Cruz Vermella – USC, cunha dotación de 1.500 euros, que recoñecerá as pezas que presenten un contido destacable no campo da diversidade entre persoas maiores.

Unha das novidades máis esperadas desta edición é a colaboración do festival co Art.Lab do Instituto Galego de Física de Altas Enerxías (IGFAE), que permitirá a creación de actividades interactivas que combinan a ciencia, o cinema e a arte. Nesta liña, destacarase a mesa redonda titulada «Instrumentos de Visión: metodoloxías e analoxías entre a ciencia e a fantasía», unha reflexión profunda sobre as interseccións entre os diferentes campos do coñecemento.

A VANGARDA AUDIOVISUAL

Ademais das proxeccións cinematográficas, Curtocircuíto é recoñecido polos seus espectáculos audiovisuais en directo. Este ano, o festival contará con 10 espectáculos AV, dos cales 4 serán galegos. Entre os artistas internacionais destacan 33EMYBW (Shanghái), Joey Holder (Reino Unido), e Ricardo Giovinetto (Italia), mentres que no panorama galego e estatal atopamos a artistas como Irene de Andrés, Xabi Bértolo e Xoán-Xil. Os espectáculos celebraranse no Teatro Principal e na Sala Capitol de Santiago de Compostela.

A xornada inaugural estará marcada pola música en directo a cargo da formación Submarina de Improvisación, que musicará o filme «Vinte mil leguas de viaxe submarina» (Stuart Paton, 1916). Ademais, Mario Santamaría presentará o seu proxecto Seguir un cable e enterrarnos no mar, e Mae Lubetkin explorará as profundidades oceánicas na súa sesión Futuros dos fondos mariños: Ciencia e ficción en dimensións profundas.

CINEMA E PATRIMONIO

Curtocircuíto continúa o seu traballo de recuperación do patrimonio cinematográfico galego. Este ano, o festival recupera o legado de Equipo 64, un colectivo de cinema amador galego fundado por Gonzalo Anaya, Enrique Banet e Ezequiel Méndez. Entre os filmes a proxectar destacan O Camiño de Santiago, Malpica e Compostela, en 16 mm, filmes que levaban máis de 50 anos sen proxectarse publicamente.

Outro aspecto destacado do festival é a súa colaboración co colectivo Galiza Emocional, que ofrecerá unha «Expedición Metaturística», unha experiencia que busca explorar Compostela desde unha nova perspectiva, da man da antropóloga Valeria Mata e o director de escena Marcos PTT.

PÚBLICO INFANTIL E XUVENIL

O público infantil e xuvenil terá tamén o seu espazo con sesións especialmente deseñadas para as súas idades. A sección Teenage Riot presentará filmes como L’Aliat de Guillem Marí, mentres que Criaturas inclúe obras como Caendo de Carlos Navarro e Os humanos constrúen os nenos máis grandes de Isaac King.

ENTRADAS E ABONOS

Os abonos e entradas para as diferentes seccións do festival xa están dispoñibles a través de Compostela Cultura. Existen diferentes modalidades de abonos, incluíndo un abono integral de 40 euros que dá acceso a todas as proxeccións e espectáculos, así como abonos específicos para proxeccións (20 euros) e espectáculos AV (30 euros). As entradas individuais para as proxeccións teñen un prezo de 4 euros, mentres que os espectáculos AV custan entre 8 e 14 euros. As sesións especiais no Teatro Principal serán gratuítas, previa recollida de convites.