Aberto o prazo de solicitude de axudas para a rehabilitación de vivendas en Santiago

A partir de mañá, 3 de outubro, ábrese o prazo de tres meses para que persoas e entidades interesadas poidan solicitar axudas para a rehabilitación de vivendas en varios barrios de Santiago de Compostela, concretamente en Pontepedriña, Vite, Vista Alegre, así como na cidade histórica. Estas subvencións, que suman un total de 4.269.600 euros, están enmarcadas no Plan de recuperación, transformación e resiliencia e son financiadas polos fondos europeos NextGenerationEU.

O Boletín Oficial da Provincia (BOP) publica hoxe dúas convocatorias de axudas. A primeira, cunha contía de 2.186.400 euros, está destinada á rehabilitación de vivendas construídas no século XX nos barrios de Pontepedriña, Vite e Vista Alegre. A segunda, de 2.083.200 euros, cubrirá intervencións en edificios situados na cidade histórica, dentro da Area de Rehabilitación Integral (ARI) e do Plan Especial de Protección e Rehabilitación.

Estas axudas buscan fomentar a mellora da eficiencia enerxética e a habitabilidade das vivendas. Entre os requisitos, é necesario que os edificios plurifamiliares conten cun uso residencial de polo menos o 50% da súa superficie, entre outras condicións técnicas, como a redución mínima do consumo de enerxía primaria nun 30%.

As subvencións poden cubrir entre o 40% e o 80% dos custos das actuacións, dependendo do aforro enerxético acadado, con aumentos en casos de vulnerabilidade económica. As persoas beneficiarias inclúen propietarios, comunidades de veciños e empresas arrendatarias.

O prazo de solicitude finaliza en xaneiro de 2025, e as actuacións deben xustificarse antes de xuño de 2026.