A Xunta Directiva da Vía Verde Compostela-Tambre-Lengüelle planifica as accións para o novo ciclo de dinamización do proxecto.
8 julio, 2025
A Xunta Directiva da Vía Verde Compostela-Tambre-Lengüelle celebrou esta mañá unha reunión en Santiago de Compostela para planificar as accións do novo ciclo de dinamización do proxecto, grazas ás axudas concedidas pola Deputación da Coruña no marco do programa DP0030/2025. O obxectivo desta nova etapa é consolidar a vía verde como un espazo de encontro, saúde, cultura e promoción do territorio, fortalecendo o seu papel como destino sostible e de calidade.
Entre as iniciativas previstas destacan o intercambio de boas prácticas, o reforzo da comunicación e da promoción en redes sociais e medios de comunicación, así como a colaboración con entidades como a Fundación de Ferrocarrís Españoles. Tamén se poñerán en marcha programas sociais dirixidos tanto ao envellecemento activo como á mocidade, accións artísticas como a creación de murais, a mellora do servizo de información turística ao pé da vía, a participación en feiras e congresos, a organización de eventos deportivos e culturais, e a elaboración de novo material promocional.
As actuacións para este ano están especialmente orientadas a implicar á poboación local, buscando que os propios veciños e veciñas dos concellos polos que discorre a vía verde se convertan nos mellores embaixadores deste recurso. Deste xeito, preténdese potenciar o sentimento de pertenza e facer da vía verde un proxecto vivo, sustentable e participado, que contribúa ao desenvolvemento socioeconómico da contorna.
A Xunta Directiva destacou a importancia de continuar co traballo iniciado nos últimos anos, consolidando a Vía Verde Compostela-Tambre-Lengüelle como un referente tanto no ámbito do lecer saudable como na dinamización cultural e turística da provincia da Coruña.
