A tradición fai festa en Compostela: 500 estudantes daranse cita na Foliada das Letras Galego-Portuguesas no parque Eugenio Granell

O parque Eugenio Granell será este venres 23 de maio o epicentro dunha auténtica celebración da cultura oral compartida entre Galicia e Portugal coa Foliada das Letras Galego-Portuguesas “Agora cantamos nós!”. A cita, organizada por Ponte… Nas Ondas!, contará coa participación de preto de 500 mozos e mozas de 15 centros educativos de ambos lados da Raia.

O evento celébrase coincidindo co Día das Letras Galegas 2025, adicado ás cantareiras e á tradición popular, e intégrase no programa conmemorativo do Banquete de Conxo. A foliada quere poñer en valor o patrimonio oral galego-portugués, recoñecido como herdanza común da lusofonía e que a ONG Ponte… Nas Ondas!, consultora da UNESCO para o Patrimonio Cultural Inmaterial, leva décadas promovendo entre as novas xeracións.

Entre as iniciativas destacadas desta entidade está a multiemisión do pasado 26 de marzo desde nove lugares de Galicia e Portugal, coa que se conmemorou o 30 aniversario da organización. Nesa ocasión, a alcaldesa de Santiago, Goretti Sanmartín, participou no acto celebrado na Facultade de Ciencias da Comunicación, onde se puxeron en valor os proxectos educativos que achegan o cancioneiro tradicional á mocidade.

Nesta nova edición da foliada, os asistentes poderán gozar dunha romaría cultural única, con música, baile e actuacións de grupos escolares e profesionais da tradición oral, nun ambiente festivo e de aprendizaxe compartida.

Programa do evento

• 10:15 h – Presentación e benvida

• 10:30 h – 12:30 h – Actuacións do primeiro bloque:

  • CEIP López Ferreiro (Compostela)

  • IES de Ames

  • IES Barral (Ponteareas)

  • CEIP Cardenal Quiroga (Compostela)

  • IES Eduardo Pondal (Ponteceso)

  • CEIP Seis do Nadal (Vigo)

  • CEIP Petelos (Mos)

  • Escola Nadir Afonso (Chaves)

• 12:30 h – 13:00 h – Actuación do grupo De Vacas

• 13:00 h – 14:00 h – Segundo bloque:

  • IES de Salvaterra de Miño

  • CEP Altamira (Salceda de Caselas)

  • Escola Profissional de Celorico de Basto

• 14:00 h – 14:30 h – Xantar e concerto de Os Fondaos do Pínfaro

• 14:30 h – 15:30 h – Terceiro bloque:

  • IES Alexandre Bóveda (Vigo)

  • IES San Clemente (Compostela)

  • CEIP A Ramallosa (Teo)