A Real Filharmonía de Galicia leva a música clásica aos barrios composteláns con tres concertos gratuítos

A Real Filharmonía de Galicia (RFG) retoma esta semana a súa iniciativa de achegar a música clásica aos espazos comunitarios dos barrios composteláns. Entre o mércores 18 e o venres 20 de setembro, a orquestra ofrecerá tres concertos gratuítos en diversos puntos da cidade: na Casa das Máquinas de Galeras, no Centro Sociocultural Santa Marta e na igrexa de Santa María da Mercé de Conxo, todos a partir das 20:00 horas. Esta iniciativa, iniciada en 2015, forma parte da estratexia de descentralización da actividade musical da RFG e ten como obxectivo facilitar o acceso á música clásica a toda a cidadanía.

Nesta ocasión, o director asistente da RFG, Sebastian Zinca, será o encargado de dirixir as interpretacións de obras de compositores como Ludwig van Beethoven, Franz Schubert, Giacomo Puccini e Amy Beach. As pezas forman parte do repertorio da nova temporada 2024-2025, titulada ‘Inconformistas’. Durante os concertos, o público poderá gozar dunha versión reducida das composicións, acompañada de breves explicacións para mellorar a comprensión das obras.

Estes concertos servirán como preludio á nova tempada da orquestra. A venda de novos abonos está aberta ata o venres 20 de setembro, dispoñibles no despacho de billetes do Auditorio de Galicia e na Zona C, en horario de mañá e tarde. A RFG busca consolidarse como unha entidade musical aberta e accesible, levando a súa música alén do Auditorio e achegándose aos veciños e veciñas de Santiago de Compostela.