A III Andaina Solidaria da Asociación Española Contra o Cancro celebrarase en Santiago o 28 de setembro

Jesús Forjados

Asociación Española Contra o Cancro (AECC) en Santiago, coa colaboración do Concello, organizará o sábado 28 de setembro a súa III Andaina Solidaria, que terá lugar a partir das 10 da mañá. O evento, que sairá do paseo central da Alameda, tamén coincidirá co desenvolvemento da feira divulgativa «Ciencia para todos», que se celebrará na mesma xornada.

Na presentación deste evento, a concelleira de Dereitos e Servizos Sociais, María Rozas, e a vicepresidenta da AECC en Compostela, Ana Peinó, fixeron un chamamento á cidadanía para que participe nesta marcha, destacando que será un día divertido en familia ao tempo que se apoia a loita contra o cancro. María Rozas subliñou a importancia de recadar fondos para continuar co apoio ás persoas con cancro e ás súas familias, así como para avanzar na investigación. A concelleira puxo en valor o traballo da AECC, resaltando a súa contribución á investigación oncolóxica, como as importantes achegas feitas ao CIMUS, que superan os 620.000 euros.

Ana Peinó, por súa banda, destacou a relevancia das achegas da AECC á investigación e á colaboración cos profesionais da cidade vinculados aos centros de investigación. Enfatizou que «o cancro é unha pandemia invisible», lembrando que unha de cada tres mulleres e dous de cada tres homes poderán padecer a enfermidade ao longo da súa vida.

DETALLES E INSCRICIÓN

A III Andaina Solidaria constará dun percorrido de 5 quilómetros, cun punto de saída e meta na Alameda. As inscricións están abertas e terán un custo de 5 euros para menores de 12 anos e de 10 euros para adultos. As persoas que desexen colaborar sen poder asistir poden facelo a través de Bizum, na conta bancaria do Santander ou na páxina web da AECC. Os fondos recadados destinaranse á investigación oncolóxica.

A inscrición pode realizarse tamén na sede da AECC en Santiago, no departamento de deportes de El Corte Inglés ou o propio día do evento, ata media hora antes do inicio. O dorsal e as camisetas, dispoñibles para as primeiras 1.500 persoas inscritas, poderán recollerse na sede da AECC até o 27 de setembro. Tamén se pode adquirir un dorsal 0 para colaborar na recadación de fondos destinados á investigación e aos programas e servizos da Asociación.