A Facultade de Ciencias Políticas celebrará mañá unha xornada sobre o xenocidio en Gaza, coa proxección do documental gañador do Óscar “No other land”

A Fundación Araguaney-Puente de Culturas, a través da Cátedra USC – Araguaney para o Diálogo entre Culturas, colabora na celebración dunha xornada sobre o ‘Xenocidio en Gaza. Testemuñas e Debates’ que se celebrará mañá martes, 7 de outubro, no Salón de Graos da Facultade de Ciencias Políticas e Sociais da Universidade de Santiago (USC) ás 18:00 horas.

A actividade, organizada pola mesma Facultade de Ciencias Políticas, estará presentada pola decana do centro, Marta Lois. Intervirán Marryvell Abu Nada, alumna palestina de 1º de Políticas, e a profesora de Relacións Internacionais da USC, Carmen Montero Ferrer.

No evento tamén se proxectará o documental “No other land” (2024. Varios directores. 1h 32min), gañador do Premio á Mellor Longametraxe Documental na 97 edición dos Premios Óscar en 2025. Foi tamén recoñecida no Festival Internacional de Cine de Berlín (Berlinale), onde colleitou numerosos premios, na que foi a súa estrea mundial en 2024. A cinta narra un acto de resistencia creativa na busca de xustiza para o conflito palestino-israelí. Profunda nun conflito histórico que vive o seu peor momento nun filme que ten capas, humanidade e toda a esperanza que se pode ter nestes momentos.

Sinopse “No Other Land”

Basel Adra, un mozo activista palestino de Masafer Yatta (Cisjordania), loita desde a súa infancia contra a expulsión masiva da súa comunidade polas autoridades israelís. Documenta a erradicación a cámara lenta dos pobos da súa rexión natal, onde os soldados despregados polo goberno israelí derriban pouco a pouco as casas e expulsan aos seus habitantes. Nun momento dado, coñece a Yuval Abraham, un xornalista israelí, que o apoia nos seus esforzos.