A Corporación municipal mostra o seu apoio ás persoas afectadas pola ELA cunha declaración institucional

Os catro grupos municipais aprobarán o vindeiro xoves unha declaración conxunta que insta á tramitación dunha proposición para que as persoas afectadas pola esclerose lateral amiotrófica (ELA), as súas familias e coidadoras, reciban unha cobertura sociosanitaria axeitada, garantindo igualdade de trato coas persoas que padecen outras patoloxías, permitindo así que poidan vivir con dignidade. A Corporación pretende «empregar a súa voz para facer chegar unha petición alta e clara ás Cortes Xerais españolas» para que tomen as medidas necesarias para «evitar a morte innecesaria e inxusta das persoas enfermas, o esgotamento dos recursos propios e familiares na súa atención e a desesperación das afectadas».

A Corporación subliña que esta nova norma «non pode volver ser anulada por trámites burocráticos, deixamento lexislativo ou outras prioridades». A pesar de non contar coas competencias sanitarias, afirma que «os municipios, como entidades públicas máis achegadas á realidade cotiá da súa poboación, non podemos, non debemos, e non queremos darlles as costas a aquelas que máis precisan do noso compromiso público para superar o seu día a día».

A declaración tamén recoñece o «traballo realizado desde hai tanto tempo polas asociacións de persoas afectadas e entidades colaboradoras, que coñecen de primeira man a dura realidade desta enfermidade», destacando especialmente a labor da asociación AGAELA (Asociación Galega de Afectados/as pola Esclerose Lateral Amiotrófica).

Salienta que a ELA é unha patoloxía neurodexenerativa, sen cura e sen tratamento hospitalario, que carga todo o peso do coidado nas redes persoais de apoio (familia, amizades, coidadoras) e que ademais supón unha carga económica imposible de asumir, non só para manter unha vida de calidade, senón, lamentablemente, a vida mesma.

Por todo isto, o Concello comprométese nesta declaración a instar ao Estado a tramitar con prioridade, urxencia e preferencia unha proposición de lei que integre as mellores achegas de normas aprobadas previamente, e tamén a pedir á Deputación Provincial da Coruña e á Xunta de Galicia que, dentro das súas competencias sociosanitarias, consideren as necesidades do colectivo de doentes e familiares ao deseñar e implementar políticas que melloren a calidade de vida das persoas afectadas. Expresa a súa intención de seguir apoiando publicamente esta reivindicación ata que a norma sexa publicada e entre en vigor.

Ademais, comprométese a poñer á disposición das persoas enfermas o asesoramento técnico dos Servizos Sociais municipais para tramitar axudas e prestacións destinadas a mellorar a súa calidade de vida, e a colaborar coa asociación AGAELA nas accións que leve a cabo para dar visibilidade e concienciar sobre a realidade desta patoloxía.