A Cámara de Comercio de Santiago aborda o papel da mediación na resolución de conflitos empresariais

A Cámara de Comercio de Santiago, en colaboración co Centro Español de Mediación, organiza mañá, xoves 30 de xaneiro, ás 12:00 horas, na súa sede de Costa Vella, a xornada «A mediación, outro xeito de resolver conflitos». O evento explorará o impacto da mediación na resolución de conflitos no ámbito empresarial e a súa relación coa mellora da competitividade das empresas.

O acto de apertura contará coa intervención da presidenta da Cámara de Comercio de Santiago, María Pais, e do presidente do Centro Español de Mediación e ex ministro de Xustiza, Rafael Catalá.

Estratexia galega de mediación e mesa redonda con expertos

A ponencia central da xornada será impartida polo director xeral de Xustiza da Xunta de Galicia, José Tronchoni, quen presentará a Estratexia galega de mediación, unha iniciativa que busca potenciar esta ferramenta como alternativa á vía xudicial tradicional.

A continuación, terá lugar a mesa redonda «Perspectivas de futuro e vantaxes da mediación no ámbito empresarial», na que participarán destacados expertos do sector xurídico e empresarial:

• Elena Gómez-Segade González: avogada e mediadora do Ilustre Colexio de Avogados de Santiago, mediadora do Rexistro de Mediadores de Familia da Xunta de Galicia e docente coordinadora da materia de MASC no Máster da Avogacía-Procuradoría da USC.
• José Antonio Fandiño: presidente do Consello Galego de Procuradores.
• Manuel Marquina Álvarez: maxistrado do Xulgado do Mercantil nº 1 de Pontevedra.
• Fátima Vázquez Espiérrez: notaria de Santa Comba e representante da Fundación Notarial Signum.

A mesa estará moderada por Fernando Cabello de los Cobos, secretario do Centro Español de Mediación.

Esta xornada busca promover o coñecemento e o uso da mediación como unha vía eficiente, rápida e menos custosa para a resolución de conflitos no ámbito empresarial, favorecendo así a seguridade xurídica e a competitividade das empresas galegas.