A alcaldesa de Santiago de Compostela, Goretti Sanmartín, recibiu esta mañá no Pazo de Raxoi a Rubén Arroxo, tenente de alcalde do Concello de Lugo, e a Maite Ferreiro, concelleira de Cultura, Turismo e Promoción da Lingua, xunto aos Pelúdez, figuras emblemáticas do San Froilán, co obxectivo de promocionar as festas que terán lugar do 4 ao 12 de outubro.
Durante o acto, Sanmartín subliñou a importancia dos lazos históricos e culturais que unen ambas cidades, recordando que Santiago e Lugo foron capitais do antigo Reino de Galicia, comparten elementos declarados Patrimonio da Humanidade e están conectadas polo Camiño de Santiago. A alcaldesa tamén destacou que tanto Compostela como Lugo comparten un compromiso pola preservación das súas tradicións, como as festas do Apóstolo e o San Froilán, ademais de ser «as dúas cidades onde máis uso da lingua galega hai». Reivindicou a necesidade de mellorar as conexións entre ambas localidades para seguir fomentando estes vínculos.
Pola súa parte, Maite Ferreiro describiu o San Froilán como «a gran festa do outono galego» e invitou a toda Galicia a participar nas celebracións e descubrir o patrimonio cultural e gastronómico de Lugo. Ademais, agradeceu o apoio do Concello de Santiago para dar visibilidade ás festas e anunciou que a pregoeira deste ano será a artista Luz Darriba, unha figura clave na declaración da Muralla de Lugo como Patrimonio da Humanidade.
A visita dos Pelúdez a Santiago foi destacada como un xesto simbólico que combina tradición e modernidade, sendo esta a primeira vez que as icónicas figuras lucenses saen de Lugo para promocionar o San Froilán. Maite Ferreiro tamén salientou que este ano as festas contarán con máis de 200 actividades que inclúen música, eventos de rúa, programación infantil e actividades relacionadas coa cultura tradicional galega, dirixidas a todo tipo de público.
As celebracións do San Froilán, que se prolongarán durante nove días, buscan crear un espazo onde tanto os habitantes de Lugo como os visitantes se sintan partícipes desta tradición centenaria.
