Elías J. Feijó toma posesión como decano de Filoloxía

O catedrático Elias J. Feijó Torres tomou posesión como decano da Facultade de Filoloxía, tras ser reelixido no mes de febreiro, nun acto institucional presidido polo reitor Antonio López e no que tamén participou a secretaria xeral da USC, Dulce María García Mella.

O novo decano asegurou a súa vontade de «continuar traballando para fomentar o sentido de pertenza» á Facultade e á Universidade.

“Ben lonxe da insuficiencia dos manuais de calidade, a necesaria calidade de vida é isto: a innovación docente, a audacia investigadora, a eficaz transferencia, a participación estudantil, os proxectos colaborativos, as salas de encontros, un permanente ollar de inclusión, diálogo e construción desde diversos ángulos, converxer, compartir, coidar, ser coidadas e coidados. A excelencia é iso, non cousas menos consistentes e efémeras”, comentou Feijóo na súa intervención.

Pola súa banda, o reitor Antonio López coincidiu na idea de abrir o espazo universitario e insistiu na necesidade de que “o coñecemento sexa útil e permita liderar e acompañar os grandes cambios que a sociedade actual afronta”, afirmou. López destacou que nos atopamos nun tempo de cambios que abren a porta a un debate sobre os modelos que pretende adoptar cada universidade. Nesa liña, lembrou que a COVID-19 deixou a experiencia do traballo baseado en modelos colaborativos e por tanto “na cultura da colaboración” que axudará a conseguir unha universidade conectada coas necesidades da sociedade.

O equipo decanal complétase coas vicedecanas Rosalía Meitín, Laurence Malingret e Alejandra Ulla, así como polo secretario Eduardo Moscoso.

O propio Feijó puxo en valor o seu traballo e o do conxunto do profesorado da Facultade, e subliñou que nela teñen a sede “23 grupos de investigación que, na súa potencia e acción, manifestan unha facultade robusta, avanzada no coñecemento e na definición de obxectivos e obxectos, dedicada a ir sempre máis lonxe na súa produción de coñecemento e desenvolvemento social”. Así mesmo, amosou o seu desexo de que a Facultade se converta “nun lugar, como espazo ocupado, confortábel e relacional”, no que se acade o benestar das persoas. E non esqueceu o estudantado, do que salientou “compromiso, lealdade e responsabilidade”.

O decano tamén lembrou que a conmemoración dos 50 anos da Facultade “terá o seu desenvolvemento no próximo ano académico 2024-2025”, sinalando que “tivo un feliz inicio na reunión de ex decanas e ex decanos do pasado mes” e “debe constituír a concretización” dos proxectos anunciados na súa toma de posesión, entre eles “o desenvolvemento dos estudos ibéricos e o fortalecemento das relación co mundo de lingua portuguesa e Latinoamérica”. «Asumimos esa conmemoración como unha esixencia de mostrar a nosa utilidade, valor e proposta nos ámbitos da docencia e da investigación, na transferencia  e na difusión do coñecemento”, cerrou Feijó.