Visitas gratis a terraza do CGAC durante a fin de semana

Pasear por Santiago pode ser unha actividade entretida e moi bonita, as súas rúas ofrecen un casco histórico ben acolledor e apetecible para pasear, incluídos os días de choiva porque estamos en Compostela. Pero hai moito máis ca ver da nosa cidade, visitaches algunha vez a terraza do museo do CGAC?

Neste lugar, que tamén podemos catalogar como miradoiro de Santiago, está situada a obra permanente do artista Dan Graham, Triangular pavillón, polo que acabarás mesturando un paseo, unha paisaxe e unha visita cultural! E de balde, que sempre presta no peto.

O acceso ao espazo realízase baixo a supervisión do persoal do centro, polo que só tes que preguntar na recepción os sábados e domingos ás 13:00. Por moito que teñas paraugas non leves un chasco se non podes subir, acceso á terraza está suxeito aos cambios meteorolóxicos. Se o tempo o permite, terás permitido subir á terraza. Estas visitas non contan con guía polo que aquí tes unha breve explicación da obra que verás alí:

Triangular pavillón, Dan Graham.

Dan Graham foi un artista estadounidense nado en 1942, considerado un dos máis importantes deste século, comezou a súa andaina no mundo laboral sendo galerista e escritor. Na esfera da arte experimentou coa fotografía, performance, vídeo e instalacións.

Entre as décadas dos anos 70 e 80, crea os seus coñecidos pavillóns. Neles traballa coa arquitectura mesturando cristais e espellos para crear instalacións como a que podemos coñecer na terraza do CGAC. Graham invitaba a xogar con eles, reflexionar como nos percibimos, como vemos os reflexos e interactuamos cos espazos.

A obra de Triangular pavillón foi creada especificamente par colocar neste lugar, desta forma os visitantes poden facer unha relación coa arquitectura do propio centro e a paisaxe de Compostela que nos permite o miradoiro.

Graham explorou a xeometría con estas figuras, deixando que os espectadores se adentraran na experiencia dende dentro e fóra. Tras unha longa vida e un longo percorrido laboral o artista falece no 2022.

Todas as visitas son de balde