30 abril, 2024
A posible instalación dunha macro-planta de celulosa impulsada por Altri na comunidade galega é un dos temas de máis actualidade e controversia entre a opinión pública. Nesta liña, o grupo de Innovación Docente Ruralia da USC organizará este venres 3 de maio a mesa redonda ‘O proxecto de Altri á luz da experiencia do modelo forestal portugués’, na que especialistas do país veciño reflexionarán acerca de incidencia que podería ter en Galicia a macro-planta desta empresa lusa en caso de chegar finalmente a materializarse. O evento terá lugar a partir das 19.00 horas na Sala de Xuntas da Escola Politécnica Superior de Enxeñaría de Lugo.
A primeira das intervencións, titulada ‘O modelo de negocio asociado ao eucalipto en Portugal: impactos’, correrá a cargo de Paulo Pimenta de Castro, licenciado en Silvicultura polo Instituto Superior de Agronomía da Universidade de Lisboa, ex profesor, coordinador de cursos e autor de programas de Formación Profesional no ámbito forestal e presidente da dirección da Asociación para a Promoción do Investimento Forestal , e a segunda corresponderalle a João Carvalho, do Departamento de Ciencias Florestais da Universidade de Trás-os-Montes e Alto Douro (UTAD) e membro da dirección da Organização Europeia de Silvicultura – Pro Silva – Integrated Forest Management, quen falará das alternativas para unha efectiva sustentabilidade.