Os impactantes xardíns do Pazo do Faramello entran a formar parte do itinerario cultural europeo de xardíns históricos

Os xardíns do Pazo do Faramello acaban de ser incluídos no prestixioso Itinerario Cultural Europeo de Xardíns Históricos, grazas á proposta presentada por Turismo de Galicia na asemblea anual celebrada o pasado mes de maio en Bruxelas.

Con esta nova incorporación, Galicia suma xa dez espazos verdes históricos recoñecidos neste itinerario europeo, consolidándose como unha das rexións máis destacadas en patrimonio paisaxístico do sur de Europa. Xunto ao Pazo do Faramello, forman parte deste selecto grupo os xardíns do Pazo de Mariñán, da Alameda de Santiago, do Pazo de Oca, de Santa Cruz de Ribadulla, Rubianes, Quinteiro da Cruz, Castelo de Soutomaior, Pazo de Lourizán e Quiñones de León.

A inclusión do Faramello supón un recoñecemento á súa beleza, historia e conservación. Entre os criterios esixidos para formar parte do itinerario están a antigüidade, a presenza de especies botánicas destacadas, o bo estado de conservación, a autenticidade do espazo, a apertura regular ao público, a organización de actividades culturais, a dispoñibilidade de servizos para os visitantes e o rexistro documental da súa historia.

A ruta da camelia, un valor engadido

Estes xardíns tamén forman parte da “Ruta da Camelia”, un proxecto impulsado por Turismo de Galicia desde 2023, que aproveita a espectacular floración desta planta emblemática para promover o turismo de calidade arredor do patrimonio botánico e cultural galego.

Este recoñecemento reforza o compromiso da Xunta de Galicia coa protección, promoción e divulgación do patrimonio natural e histórico da comunidade, ofrecendo unha alternativa cultural e paisaxística de alto valor para galegos e visitantes.