O COAG visou case 18.000 vivendas novas entre 2019 e 2024

O Colexio de Arquitectos de Galicia (COAG) presentou hoxe o seu informe sobre a Evolución do visado de vivendas de nova planta no período 2019-2024, que revela a tramitación de 17.933 vivendas en Galicia nos últimos seis anos, das cales 8.415 foron vivendas colectivas e 9.518 unifamiliares. O ano 2024 supuxo un fito, con 3.484 vivendas visadas, a cifra máis alta da última década. Ademais, o primeiro semestre de 2025 apunta a un novo incremento: un 19 % máis de visados, cunha suba do 26 % na vivenda colectiva e do 6 % na unifamiliar.

O decano do COAG, Luciano Alfaya, e a secretaria da Xunta de Goberno, María Pierres, presentaron os datos esta mañá nun acto celebrado na sede colexial da Praza da Quintana, en Santiago. Alfaya reivindicou o papel do COAG como fonte fiable e esencial de información urbanística e construtiva, animando á cidadanía, ás administracións e aos sectores produtivos a utilizar estes datos para planificar con criterio a medio e longo prazo.

Un sector marcado polos impactos globais

O informe contextualiza a evolución da vivenda en Galicia nun panorama internacional marcado por crises sucesivas: a pandemia da COVID-19, o bloqueo da canle de Suez, a guerra en Ucraína ou o conflito en Gaza. Estes eventos, segundo Alfaya, alteraron as cadeas de subministro e os custos dos materiais, o que afectou directamente á actividade construtiva.

Así, tras un repunte dos visados nos anos 2021 e 2022, a vivenda colectiva caeu en 2023, perdendo un 31 % do incremento previo, posiblemente debido aos retardos administrativos e á conxelación de investimentos derivadas da pandemia. Porén, en 2024 rexistrouse unha recuperación notable, cun 40 % máis de vivendas colectivas visadas respecto da media dos cinco anos anteriores, malia que os prezos dos materiais se dispararon cunha media de subida do 29 % e picos de ata o 70 %.

No caso da vivenda unifamiliar, o informe atribúe o crecemento de 2020 a 2022 ao chamado «efecto pandemia», mentres que a súa redución posterior se explica polos elevados custos construtivos.

O eixo atlántico lidera a construción

Por provincias, A Coruña lidera o visado de vivenda con 8.532 unidades (4.072 colectivas e 4.460 unifamiliares), seguida por Pontevedra con 6.814, Ourense con 1.297 e Lugo con 1.290. A análise comarcal revela que o eixo atlántico, xunto ás sete cidades galegas e as cabezas de comarca, concentran a maior parte da actividade, cun crecemento nos concellos limítrofes.

Moita vivenda visada, pouca vivenda protexida

Alfaya advertiu dunha fenda importante entre o volume de vivendas visadas e o tipo de vivenda realmente dispoñible. Segundo datos do Observatorio da Vivenda de Galicia, a vivenda protexida non supera o 5 % do total construído, un dato preocupante para garantir o acceso á vivenda nun contexto de alta demanda.

Tamén puxo o foco nas vivendas que non chegan a rematarse: segundo o decano, máis de 50.000 vivendas visadas antes de 2020 non se finalizaron, na súa maioría por mor da crise económica. A media actual entre o visado e o remate dunha obra é de tres anos, o que dificulta unha resposta áxil á demanda social.

O nivel actual: só o 10 % da actividade construtiva de hai dúas décadas

O informe revela que, malia o repunte recente, a actividade construtiva actual está moi lonxe dos niveis previos á crise inmobiliaria. As vivendas visadas en 2024 son un 164 % máis que en 2014, pero apenas representan o 10 % das visadas en 2004 e o 20 % das de 1994. Para Alfaya, “non se albiscan trazas de recuperación do volume construtivo anterior. No mellor dos casos, estamos creando arredor do 15 % das vivendas que se promovían nos anos máis baixos da burbulla”.