Máis de 200 persoas participaron na XXVIII Noite Galega das Telecomunicacións e da Sociedade da Información

O Colexio Oficial e a Asociación de Enxeñeiros de Telecomunicación de Galicia celebrou hoxe a XXVIII Noite Galega das Telecomunicacións e da Sociedade da Información, evento que tivo lugar no Gran Hotel da Toxa, no Grove. Presidida polo conselleiro de Facenda e Administración Pública, Miguel Corgos, a gala congregou máis de 200 asistentes, recoñecendo o labor de profesionais e entidades que contribuíron ao avance tecnolóxico de Galicia.

Durante a cerimonia, entregáronse os Premios Galicia das Telecomunicacións e da Sociedade da Información 2024, que nesta edición estiveron centrados no lema “30.454: Conexión total para vivir”, facendo referencia aos esforzos para levar a conectividade a máis de 30.000 entidades de poboación en Galicia. A gala destacou os avances en tecnoloxías como o 5G e as estratexias de ciberseguridade e conexión satelital.

Julio Sánchez Agrelo, decano do Colexio e presidente da Asociación de Enxeñeiros de Telecomunicación de Galicia, salientou que “grazas á nosa profesión, a conectividade chegou aos lugares máis remotos de Galicia, mellorando a calidade de vida, fomentando a innovación e impulsando o desenvolvemento económico.” Tamén fixo referencia ao desafío da repoboación dixital, destacando o papel crucial da conectividade para revitalizar zonas rurais e atraer teletraballadores.

Entre os premiados da noite, Alfredo Ramos, director de R e MásOrange en Galicia, foi nomeado Enxeñeiro do Ano pola súa contribución ao desenvolvemento tecnolóxico da comunidade. Ramos, visiblemente emocionado, agradeceu o galardón, subliñando o traballo arreo para reducir a fenda dixital en Galicia.

Outros recoñecementos incluíron a Muditel, o Museo Didáctico das Telecomunicacións, premiado como Socio de Honra polo seu labor na preservación do patrimonio tecnolóxico, e o proxecto CelIA, que recibiu o premio ao mellor proxecto TIC con beneficios sociais 2024 pola súa utilidade no apoio ás persoas que sofren soidade non desexada, entre outros galardóns.

A noite pechouse coa intervención do conselleiro Miguel Corgos, quen destacou o importante papel das telecomunicacións na transformación dixital e económica de Galicia, seguida dunha cea de gala que puxo fin ao evento.