A Mesa do Audiovisual Galego, que agrupa as principais organizacións profesionais do sector, expresou a través dun comunicado a súa profunda preocupación fronte ao borrador do Anteproxecto de Lei de Servizos dos Medios Públicos de Comunicación Audiovisual de Galicia para a Sociedade Dixital, presentado recentemente polo Consello da Xunta. O sector advirte que o texto, tal e como está formulado, podería provocar un rexeitamento xeralizado entre os profesionais do ámbito audiovisual en Galicia.
Un dos principais puntos de discordia é a falta de consulta previa. Segundo denuncia a Mesa, ningunha das asociacións representativas do sector foi consultada antes da redacción do anteproxecto, coñecendo o contido deste só tras a súa publicación o pasado 29 de xullo. Ademais, o período para presentar suxestións, que inicialmente foi definido como de «alegacións», coincide co mes de agosto, un período tradicionalmente inhábil.
A Mesa do Audiovisual Galego advirte que este novo anteproxecto supón un retroceso significativo na independencia e na función social dos medios públicos galegos. Un dos aspectos máis críticos é a eliminación do Estatuto Profesional e do Consello de Informativos, así como o afastamento do proceso de elección do director xeral do consenso político e social, cuestións que, segundo a Mesa, comprometen a calidade e independencia informativa da CRTVG.
Outro punto de gran preocupación é a posible modificación do papel da CRTVG na promoción e difusión da lingua galega. O novo texto abriría a porta á emisión de contidos en castelán, algo que, segundo o colectivo, podería impactar negativamente na protección e promoción da lingua galega, especialmente nun momento no que o seu uso entre a poboación está en retroceso.
Ante esta situación, a institución solicitou unha reunión urxente co Presidente da Xunta de Galicia, Alfonso Rueda, para esixir explicacións e pedir que se reconsideren os aspectos máis controvertidos do anteproxecto.
Neste senso, o sector audiovisual galego mantén que os medios públicos deben seguir sendo garantes da identidade cultural e lingüística de Galicia, defendendo a súa independencia e pluralidade en todos os seus ámbitos.
Por outra banda, esta Mesa do Audiovisual Galego está integrada por a Academia Galega do Audiovisual (AGA), a Asociación de Actores e Actrices de Galicia (AAAG), a Asociación Galega de Produtoras Independentes (AGAPI), a Asociación Galega de Profesionais da Dirección e Realización (CREA), a Asociación Sindical Galega de Guionistas (AGAG), o Clúster Audiovisual Galego (CLAG) e a Coordinadora Galega de Festivais de Cinema (PROXECTA).
