Pontevedra, sede dunha nova edición o 28 de setembro do «Día do Adestrador»

O Comité Galego de Adestradores da Real Federación Galega de Fútbol (RFGF) organiza o próximo sábado 28 de setembro outra edición do xa tradicional «Día do Adestrador», un evento que terá lugar na sede Afundación de Pontevedra a partir das 11 horas.

Nesta nova edición que pon en marcha o departamento que dirixe Iván Cancela, e que será en formato de mesa redonda, estarán presentes catro adestradores de primeiro nivel:

• Luis de la Fuente: seleccionador español absoluto campión da Nations League e da Eurocopa
• Santi Denia: seleccionador español sub 21 e campión olímpico
• Pablo Amo: adestrador asistente da Selección Española absoluta
• Antonio Vadillo: adestrador do Palma Futsal, campión das dúas últimas edicións da UEFA Futsal Champions League e mellor adestrador de fútbol sala do Mundo

Homenaxe aos adestradores/as máis destacados/as

O Comité Galego de Adestradores da RFGF aproveitará o evento para facer un recoñecemento aos adestradores de honra de fútbol, fútbol sala, fútbol praia e fútbol gaélico.