Derrota pola mínima que deixa sen puntos a un CD Arenteiro que o intentou ata o final

O Club Deportivo Arenteiro visitaba o Suárez Puerta coa misión de loitar polos puntos en xogo ante un dos rivais máis en forma da categoría. Once de garantías disposto por Arribas para tentar atopar o camiño cara a un premio xa perseguido con afán e esforzo nas xornadas precedentes. Primeiros minutos de contemporización con ambos conxuntos buscando espazos e cun Arenteiro ordenado e serio, que trataba de aproveitar as oportunidades que xurdían co paso dos minutos. Houbo chegadas en ambas áreas, e tamén protagonismo para as defensas e gardametas. Diego García convertíase en figura fronte a Campabadal para evitar o primeiro da tarde.

O desenvolvemento da primeira metade deixaba ver un Arenteiro ambicioso aínda que sen fortuna nos metros finais. Os verdes tentaban ocupar espazo en faceta ofensiva buscando a conexión con Martín Ochoa en punta de ataque e con Richarte polo carril exterior. A sorte non acompañaba aos visitantes nesta tarde, xa que tras unha gran ocasión que non se transformaba en gol tras golpear no pau da meta local, sería o Avilés quen se adiantase no marcador grazas ao gol de Kevin. Un envío dende a frontal tras pase de Campabadal que superaba a Diego na súa estirada.

A segunda parte mantíña o ton intenso visto na primeira. Os homes de Arribas trataban de atopar o camiño cara ao empate, e o equipo adiantaba liñas e metros para situar o bloque preto da área rival. As ocasións repartíanse e o conxunto verde melloraba as súas sensacións en ataque, aínda que tamén se vía obrigado a equilibrar o debuxo en materia defensiva para evitar os envites dun Real Avilés ambicioso en todo momento. Aguza e David Ferreiro entraban no terreo de xogo para sumar criterio e creación nos carrís centrais á construción ofensiva.

A tarde non favorecía os intereses verdes, e o Arenteiro, malia manter o seu empuxe e ambición por lograr o empate, vía como o segundo acto se esvaecía sen fortuna nos metros finais. Máis intentos e máis chegadas que, con todo, non terminaban de concretarse en tanto. Dani González, William e Mingo tamén se sumaban ao reto para achegar músculo e chegada nunha zona crítica que precisaba dun novo acerto para converter as ocasións en boas noticias. A pesar dos intentos desenvolvidos, o Real Avilés remataría impoñendo a súa lei e os tres puntos quedaban en terras asturianas, deixando sen premio ao equipo verde, que terminou dominando no control de balón, aínda que sen fortuna na definición.