A Selección Galega UEFA inicia o seu camiño cun novo corpo técnico

Coa ilusión e ambición por bandeira. A campioa de Europa hai dous anos xa está en marcha coa vista posta na próxima aventura, a primeira fase nacional da Copa das Rexións UEFA. O combinado galego inicia un novo camiño, un novo ciclo co técnico Manolo García ao mando de todas as operacións.

A competición poñerase de novo en marcha a partir do próximo mes de novembro coa disputa das fases nacionais nas que Galicia tentará proclamarse campioa de España para acceder posteriormente á loita polo título europeo.

Para esta nova aventura, Galicia conta cun novo corpo técnico capitaneado polo adestrador Manolo García. O novo staff da Selección Galega que participará nesta nova edición da Copa das Rexións UEFA queda configurado da seguinte maneira:

• Manolo García: Seleccionador
• José Luis Fontao: Adestrador asistente
• Iván Balaguer: Adestrador asistente
• Samuel Martínez: Adestrador de porteiros
• Lalo Suárez: Adestrador analista
• Pablo Vigo: Preparador físico
• Jose M. Varela: Fisioterapeuta

Andalucía e Castela e León, os nosos rivais na primeira fase

A Selección Galega xa ten rivais para a primeira fase nacional da Copa das Rexións UEFA tras o sorteo que tivo lugar recentemente na sede da RFEF en Las Rozas. O sorteo nos deparou xogar en Castela e León contra a selección anfitrioa e a selección de Andalucía.

A selección galega xogará o sábado 29 contra Andalucía e o domingo 30 contra Castela e León. Andalucía e Castela e León abrirán o grupo o venres 28.

Toda a información do campionato, con calendario, pode consultarse no seguinte documento: COPA REXIÓNS UEFA

Nesta primeira fase clasificaranse oito equipos que disputarán en formato eliminatoria a un partido entre o 28 e o 29 de xaneiro. Os catro equipos que pasen xogarán polo título nacional do 27 de febreiro ao 1 de marzo.