A Escola Dokkodo contou con tres representantes no Campionato de España Infantil de Karate

Os pasados días 12 e 13 de abril celebrouse en Logroño o Campionato de España Infantil de Karate 2025, unha das citas máis destacadas dentro do calendario deportivo nacional para as categorías base deste deporte. Nesta ocasión, a Escola de Karate Dokkodo contou coa participación de tres deportistas que formaron parte da selección galega; Tiago Blanco, Xián Blanco e Jadel Rodríguez.

Pola súa banda, Tiago Blanco competiu na modalidade de Kata Alevín, mentres que Xián Blanco participou en Kumite Infantil <45kg, onde acadou o 7º posto. Ámbolos dous karatekas están a competir por primeira vez nestas categorías, enfrontándose a rivais con maior experiencia e idade. Con todo, ambos amosaron un gran nivel ao longo de toda a competición. Por outro lado, Jadel Rodríguez participou na modalidade de Kumite Infantil >45kg, realizando tamén unha boa actuación.

Representación a nivel técnico
Ademais da participación dos karatekas no campionato, o club amesán de karate contou con representación a nivel técnico, pois Enrique Blanco exerceu como delegado da expedición galega e Adrián Seoane actuou como árbitro nacional durante varios combates da proba.

Nos días previos á competición, celebrouse tamén na localidade de Logroño o Curso Nacional de Arbitraxe, no que participaron os dous técnicos da Escola Dokkodo para actualizar así as súas titulacións e reafirmar o seu compromiso coa formación.

A pesar de ser un club pequeno, é destacable que chegara a acadar representación deportiva, técnica e arbitral nunha proba estatal, un feito que poucos clubs poden conseguir. Deste xeito, ponse en valor o traballo diario que se realiza desde a escola amesá.