Ribeira transformará a antiga fábrica de salgadura de punta do Castro nun punto cultural e turístico

A antiga fábrica de salgadura de Castiñeiras, situada xunto á praia do Castro-A Catía, será revitalizada para converterse nun espazo de interpretación da paisaxe e recurso cultural e turístico, segundo avanzou hoxe a alcaldesa de Ribeira, María Sampedro, durante a visita ao inmoble.

Na xornada participaron tamén a conselleira de Medio Ambiente e Cambio Climático, Ángeles Vázquez, e o conselleiro de Cultura, Lingua e Xuventude, José López Campos, así como os concelleiros locais de Mar e de Medio Ambiente, Fernando Abraldes e Víctor Reiriz, respectivamente. A visita serviu tamén para presentar o Catálogo de bens de valor cultural no litoral aprobado recentemente pola Xunta de Galicia.

O proxecto, incluído no Plan de Sostibilidade Turística de Ribeira e financiado con fondos Next Generation, conta cun orzamento de uns 150.000 euros. O deseño prevé consolidar a edificación existente e poñer en valor as pilas de salgadura, ao tempo que se instalarán unha serie de estruturas de balancín que funcionarán como miradoiro, reforzando o vínculo do inmoble co mar.

A iniciativa busca reproducir o mecanismo característico da industria da salgadura do século XIX, permitindo ao público comprender e apreciar o patrimonio industrial e paisaxístico da zona, ao tempo que se promove un uso cultural e turístico da nave histórica.