O alcalde, Luís Pérez Barral, amosou a súa satisfacción pola resolución, subliñando que “é unha excelente noticia para Ribeira e para toda a veciñanza, porque estes fondos permitirán acometer investimentos que cambiarán a nosa cidade e mellorarán a calidade de vida da xente”.
Segundo Pérez Barral, “cando chegamos ao goberno atopámonos cun Concello afogado nunha débeda de 13 millóns de euros, e agora pretenden botarnos por facer ben o noso traballo, precisamente no momento no que acabamos de conseguir 6,5 millóns de euros para investir máis de 10 millóns en mellorar Ribeira. Iso é responsabilidade e boa xestión”.
Un proxecto transformador para a Ribeira do futuro
O Plan de Actuación Integral (PAI) presentado polo Concello de Ribeira, e agora parcialmente financiado con fondos europeos, supón un investimento global de máis de 10 millóns de euros. O proxecto persegue revitalizar o barrio histórico de Banda ao Río e converter Cerqueira nun epicentro social, cultural e de innovación, recuperando o patrimonio industrial conserveiro e creando novos espazos de convivencia, cultura e participación veciñal. Ademais contémplase a construción dun centro multiúsos, de menor cabida, destinado a promover a integración social, e o fortalecemento da convivencia veciñal podendo acoller unha grande variedade de actividades de todo tipo, dende a inclusión até a recuperación de tradicións locais.
A actuación contempla tamén unha rexeneración urbana integral da Praza de Pontevedra, que se converterá nun gran espazo público verde, accesible e aberto ao mar, con zonas de xogo, pistas deportivas e áreas interxeracionais. Ademais, prevese a creación dun aparcadoiro disuasorio soterrado con capacidade para 250 vehículos, que favorecerá a mobilidade sostible e o acceso ao centro urbano. O estacionamento ten un enfoque intermodal xa que a súa localización céntrica permite conectar a cidade a pé, co transporte público e cun futuro punto de préstamo de bicicletas.
O proxecto está alineado coa Axenda Urbana de Ribeira, aprobada por unanimidade de todos os grupos da Corporación, e ten como principios reitores a sostibilidade ambiental, a eficiencia enerxética e a cohesión social. Inclúe a plantación de máis de 200 árbores autóctonas, o uso de tecnoloxías verdes e a rehabilitación de edificios históricos, reducindo a creación de novas estruturas e recuperando o existente.
Un modelo de cidade sostible, inclusiva e con identidade
Con esta nova visión de cidade, o goberno ribeirense, aposta por investir nas zonas máis degradadas do municipio, recuperando edificios históricos en lugar de crear novas edificacións, xerar espazos verdes e resolver a necesidade de estacionamento. “Estes cartos súmanse ao forte investimento realizado nestes dous anos que supuxo investir nas parroquias ribeirenses 5,5 millóns de euros” declarou Pérez Barral.
Pola súa banda, o concelleiro de Sanidade, Juan Luis Furones, informou que a principal función do proxecto, “é a integración dun entorno deixado, deteriorado e con diferentes problemáticas, nunha zona reformulada no conxunto da cidade dentro da planificación integral e transversal que leva facendo este goberno co urbanismo”. Furones engadiu que “con este proxecto o que se pretende e devolver a Banda ao Río á centralidade que merece na cidade”. O concelleiro significou a importancia destes 6,5 millóns, “que non se traduce nunha obra que falta por pagar como recibiu de herdanza este Goberno, se traduce en que vai a contribuir á integración de todos/as a que vivamos nunha Ribeira na os dereitos sexan dereitos e non favores”.
Os membros do executivo local aseguran que con este investimento sáldase a débeda histórica cun dos barrios que menos recursos económicos recibía.
Con este proxecto Ribeira non só transforma a súa fachada marítima, senón que reforza a súa identidade, aposta pola cohesión social facendo espazos de convivencia e avanza decididamente nese modelo de cidade máis sostible, verde e humana.
O proxecto fora aprobado no pleno celebrado en febreiro de 2025 tendo os votos a favor de BNG, PBBI, PSOE e abstención do PP.
