Porto do Son aposta pola arte urbana cun mural para reivindicar as súas raíces mariñeiras

O Concello de Porto do Son vén de iniciar os traballos dun novo mural na entrada da vila, unha intervención artística concibida como elemento de cohesión social e cultural que busca embelecer o espazo público e reforzar a identidade mariñeira que caracteriza ao municipio. A obra pretende poñer en valor tradicións, símbolos e elementos naturais que definen a esencia sonense.

Os concelleiros Carlos José Lorenzo e María José Maroñas participaron nas primeiras pinceladas do mural, nunha actividade na que tamén colaboraron alumnos e alumnas do IES de Porto do Son. A xornada desenvolveuse como un taller formativo dirixido polo muralista Doctor Toy, que explicou ao alumnado as técnicas da arte mural e introduciu o concepto de artivismo como ferramenta de expresión social.

A iniciativa busca fortalecer a conexión da mocidade coa localidade e coa súa identidade mariñeira a través da creatividade, destacando o papel dos máis novos como axentes activos de cambio e participación comunitaria.

A obra enmárcase no proxecto 9 murais participativos do GALP Costa Sostible e está previsto que se complete ao longo do próximo ano. O mural recolle algunhas das tradicións máis representativas de Porto do Son, como a pesca, o traballo das redeiras ou o marisqueo, xunto coa súa contorna natural, na que o mar, o monte Louro, a vida mariña e mesmo o Camiño de Santiago se converten en protagonistas visuais.

A intervención utilízase, ademais, pinturas fotocatalíticas capaces de absorber CO₂, contribuíndo así ao coidado do medio ambiente e incorporando un valor engadido sostible ao proxecto.