Padrón acolle a primeira edición da Mostra de Cinema Galego FOCO

O Concello de Padrón presentou hoxe a primeira edición da Mostra de Cinema Galego FOCO, que se celebrará os días 17, 18 e 19 de outubro en diferentes espazos da vila. A iniciativa, organizada en colaboración coa Corporación Cortizo, a Fundación Rosalía de Castro e o colectivo FOCO, nace co obxectivo de crear un espazo estable de encontro arredor do cinema galego, combinando proxeccións, coloquios, actividades musicais e propostas para todas as idades.

O programa inaugural inclúe a proxección do biopic ‘Antes de Nós’, dirixido por Ángeles Huerta, que aborda a figura de Castelao e a súa relación con Virxinia Pereira en dous momentos cruciais das súas vidas. O pase terá lugar o venres 17 ás 19.00 horas no auditorio do Parque Tecnolóxico Cortizo e irá acompañado dun coloquio co guionista Pepe Coira, referente da ficción galega contemporánea.

O sábado 18 de outubro a programación trasladarase á rúa Real, coa actividade infantil ‘A Caixiña de Mistos’, o chamado cine máis pequeno do mundo, que ofrecerá curtametraxes para público familiar entre as 11.00 e as 14.00 horas. Pola tarde, o Auditorio da Casa de Rosalía proxectará ‘A poeta analfabeta’, documental de Sonia Méndez sobre a poeta e activista Luz Fandiño, seguido dun coloquio coa produtora Nati Juncal. A xornada pecharase cun concerto de O’Leo de Matamá ás 20.00 horas.

O domingo 19 de outubro, a Mostra culminará no Auditorio de Padrón ás 18.00 horas coa proxección do documental ‘A loita final’, dirixido por Enrique Banet e producido por Mabel Rivera, que analiza as consecuencias sociais e ambientais do proxecto industrial de ALTRI en Palas de Rei. Tras o pase celebrarase unha charla co director e a entrega do I Foco de Honra á actriz Mabel Rivera, recoñecendo a súa traxectoria no cinema, teatro e televisión en Galicia e no ámbito internacional.

O alcalde de Padrón, Anxo Arca, destacou a importancia dos diferentes espazos que acollerán a Mostra: “Eramos conscientes de que en Padrón existían lugares que podían conferir dignidade a esta iniciativa. Quero agradecer á Corporación Cortizo e á Fundación Rosalía de Castro a súa excelente disposición, xa que contan con instalacións especialmente acaídas para este propósito”. Arca subliñou tamén a aposta pola participación de todos os públicos e a vontade de consolidar FOCO como unha cita relevante dentro da oferta cultural da vila.

Ademais das proxeccións, a Mostra inclúe a iniciativa ‘Un comercio de cine’, que ata o domingo 19 exhibirá nos escaparates de diversos establecementos programas de man das antigas salas de Santiago de Compostela, oferecendo unha viaxe pola memoria cinematográfica da contorna.