Os maiores de Frades celebran o final do curso cunha festa que deixa ganas de volver

O centro sociocomunitario de Frades converteuse esta mañá nun espazo de celebración e emoción coa festa de fin de curso organizada para os maiores que participaron nas actividades anuais gratuítas promovidas polo Concello.

A cita tivo lugar no local de Ponte Carreira, onde os asistentes gozaron dunha mañá de lecer, café e boas conversas. Ao seu carón estivo o concelleiro de Ensino, Manuel Ferreiro Marzoa, quen aproveitou a ocasión para intercambiar impresións coas persoas usuarias e recoller ideas para futuras propostas.

Durante o curso 2024-2025, os maiores tiveron á súa disposición unha ampla variedade de actividades: obradoiros de memoria, ximnasia, manualidades, cociña, pintura… e moitos momentos compartidos. «Queremos un centro vivo, que funcione a diario e sexa un punto de encontro para a veciñanza», asegurou Ferreiro, quen tamén destacou o éxito das actividades puntuais organizadas ao longo do ano.

A xornada de hoxe non foi unha despedida calquera: foi unha mostra de que o envellecemento activo é posible e moi divertido.