O Outono Cultural de Rois volve con cinema, teatro e maxia gratuítos nos fins de semana de novembro e decembro

O Concello de Rois presenta a súa programación do Outono Cultural 2025, unha completa oferta de espectáculos de cinema, teatro e maxia pensados para diversos públicos, que se desenvolverán durante os meses de novembro e decembro no Auditorio Municipal. Todos os eventos son de entrada libre ata completar aforo.

A programación arrinca o sábado 15 de novembro coa proxección da premiada película As Bestas (NRM13), un drama ambientado na Galicia rural que gañou nove premios Goya, incluíndo mellor película e mellor actor de reparto para o compostelán Luis Zahera.

Os sábados seguintes continuarán as propostas teatrais: o 22 de novembro, a compañía Talía Teatro presentará Bicos con lingua, unha comedia que invita a reflexionar sobre os usos e abusos da lingua galega. O mes pecharase o 29 de novembro coa obra Sen lingua, de Serea Teatro, na que un matrimonio en crise agarda a súa quenda nunha sala de espera dun coach emocional.

Xa en decembro, o ciclo inclúe dúas novas propostas teatrais: o 13 de decembro, Malasombra Teatro traerá a comedia De algo hai que morrer, e o 20 de decembro, Contraproducións subirá ao escenario con Apaga o candil, unha reflexión cargada de humor e ironía sobre a realidade contemporánea. Todas estas funcións comezarán ás 20:00 horas no Auditorio Municipal.

O programa tamén reserva un espazo especial para o público infantil e familiar dentro do ciclo Outono Miúdo, todos os venres ás 18:00 horas. O 21 de novembro, a compañía Teatro Gazafelhos presentará Travesía Unicornio, unha proposta chea de humor que rompe roles tradicionais de xénero, permitindo que a cativada escolla libremente segundo os seus gustos.

Xa nas vacacións de Nadal, o 19 de decembro, o Mago Paco encherá o auditorio de ilusión co espectáculo A maxia do Nadal, e o 26 de decembro proxectarase a película Wonka, unha historia familiar na que a imaxinación e a música se dan a man para narrar os inicios do mestre chocolateiro Willy Wonka.