O Concello de Padrón homenaxea ás mulleres da vila con ‘Rumorosas 2025’

Redacción

O Concello de Padrón, en colaboración co Centro de Información á Muller (CIM) Terras de Iria, celebra o Día Internacional da Muller cunha nova edición de Rumorosas 2025, unha iniciativa que pon en valor a traxectoria de oito mulleres que marcaron a historia local, así como o traballo do propio CIM na defensa dos dereitos das mulleres.

Nesta edición, as homenaxeadas son María José Castro, Beatriz Vázquez Lorenzo, Elena Villaverde Sóñora, Isabel Oliveira, Martina López, Miriam Cortizo e Noa Vázquez, ademais do CIM Terras de Iria. Todas elas destacan polo seu esforzo en ámbitos como o comercio, a cultura, a educación, o deporte, a arquitectura ou a moda, representando o espírito de superación e compromiso coa igualdade.

Mulleres que fan historia en Padrón

María José Castro, Sesi recibe este recoñecemento en lembranza da súa nai, Ramona Froján Díaz, quen converteu un pequeno comercio nunha tenda de referencia en produtos para bebés en Padrón. María José continuou o legado familiar, ampliando a actividade cara ao turismo e a hostalaría. Destaca que “o respecto é a clave para acadar a igualdade”.
Beatriz Vázquez Lorenzo, soprano e catedrática, ten unha destacada carreira na recuperación da canción galega e feminina. Afirma que “o 8M é unha oportunidade para lembrar as voces das esquecidas”.
Elena Villaverde Sóñora, enfermeira especializada en Enfermaría Familiar e Comunitaria, pioneira no acollemento familiar en Padrón, subliña que “o 8M debe ser un día de loita pola igualdade real e pola educación”.
Isabel Oliveira, mestra especializada en Educación Infantil, leva máis de dúas décadas no CEIP Flavia impulsando proxectos innovadores. Para ela, “o 8M reivindica a igualdade e a oportunidade das mulleres para desenvolver as súas capacidades”.
Martina López, triatleta de élite, foi campioa de España de tríatlon de media distancia (35-39 anos). Afirma que “o 8M é un día para lembrar o valor da muller na sociedade e a importancia de loitar unidas”.
Miriam Cortizo, arquitecta e directora técnica, traballa na sustentabilidade e o deseño urbano, sendo recoñecida con premios de eficiencia enerxética. A súa mensaxe neste 8M é clara: “as mulleres debemos facernos respectar e loitar para que as nosas capacidades sexan recoñecidas”.
Noa Vázquez, experta en xestión de moda e luxo, emprendedora da marca Doziños, subliña que “nunca debemos deixar de loitar polos nosos soños”.
CIM Terras de Iria, con 30 anos de traballo, é un referente na loita pola igualdade en Padrón, Rois e Dodro, ofrecendo apoio xurídico, psicolóxico e programas de formación para as mulleres.

O Concello de Padrón reafirma o seu compromiso coa igualdade e a visibilidade do papel fundamental das mulleres na construción da sociedade. Rumorosas 2025 busca lembrar o seu legado e inspirar ás futuras xeracións.