O Concello de Oroso investiu máis de 1,4 millóns de euros en 2024 grazas ao Plan Único da Deputación da Coruña

O Concello de Oroso destinou ao longo deste ano máis de 1,4 millóns de euros procedentes do Plan Único (POS+) da Deputación da Coruña, un programa co que se executan actuacións destinadas a mellorar infraestruturas, servizos públicos e equipamentos municipais.

Desde o ano 2017, a Deputación da Coruña concedeu ao municipio máis de 7,6 millóns de euros a través deste plan provincial, o que permitiu desenvolver múltiples proxectos que contribúen ao benestar da veciñanza e á mellora continua do termo municipal.

A deputada provincial de Plans Provinciais e Asistencia a Concellos, Cristina García Rey, visitou este xoves Oroso para comprobar o resultado da nova ponte sobre o río Carboeiro, xunto co alcalde de Oroso, Álex Doval, e membros da corporación municipal. Esta actuación, rematada este mes de novembro, recibiu un financiamento de algo máis de 80.000 euros da Deputación da Coruña, ao abeiro do Plan Único.

O Plan Único continúa a ser unha das principais ferramentas de colaboración institucional entre a Deputación e o Concello de Oroso, garantindo investimentos estables e sostibles para o desenvolvemento local.