O Concello de Boqueixón e a Federación Galega de Espeleoloxía organizan visitas guiadas á cova do Pico Sacro

Redacción

O Concello de Boqueixón e a Federación Galega de Espeleoloxía organizarán 28 visitas guiadas á cova do Pico Sacro durante sete sábados nos meses de xuño, xullo, agosto e setembro. Estas visitas permitirán que 140 persoas, maiores de 12 anos, descubran os segredos da cova máis lendaria de Galicia. As persoas interesadas en participar na iniciativa “Baixadas espeleolóxicas ás covas do Pico Sacro” poderán anotarse a partir do luns 10 de xuño a través do correo electrónico espeleoloxia@gmail.com.

Esta mañá, no propio Pico Sacro, o alcalde de Boqueixón, Ovidio Rodeiro, xunto co presidente da Federación Galega de Espeleoloxía, Gonzalo Villarmea, presentaron a iniciativa. Rodeiro agradeceu o traballo dos técnicos da Federación, destacando a importancia destas actividades para poñer en valor o Pico Sacro e apoiar a súa declaración como Ben de Interese Cultural. Ressaltou tamén que o Pico Sacro é un referente turístico en Galicia e un punto clave para os amantes do deporte.

Pola súa banda, Gonzalo Villarmea subliñou a seguridade da actividade e o valor da experiencia, xa que a cova do Pico é un lugar especial tanto dende o punto de vista cultural, pola tradición da Raíña Lupa e o dragón, como dende o punto de vista xeolóxico e espeleolóxico, sendo unha montaña de cuarzo nunha área de granito e unha das poucas covas visitables en Galicia xunto á Cova do Rei Cintolo.

As baixadas á cova do Pico Sacro serán guiadas por técnicos da Federación Galega de Espeleoloxía, que proporcionarán todo o equipo necesario. Tras unha formación técnica sobre o manexo dos arneses, as cordas e a escaleira, cada grupo de 5 persoas entrará polo Pazo da Raíña Lupa e sairá pola Contramina de Juan Antón. A visita inclúe un descenso vertical inicial polo “Pozo do Pico”, con dous rápeles de 6 e 13 metros, e un ascenso de 8 metros dende o Burato dos Mouros ata a Contramina de Juan Antón. A duración total será de 2 horas.

As visitas realizaranse os días 29 de xuño, 13 e 27 de xullo, 10 e 24 de agosto, e 7 e 21 de setembro en catro horarios diferentes: de 10:00 a 12:00 horas, de 12:00 a 14:00 horas, de 16:00 a 18:00 horas e de 18:00 a 20:00 horas, suxeitas a modificacións dependendo da climatoloxía.

Os participantes deben ser maiores de 12 anos (os menores deben estar acompañados por un titor legal) e anotarse a partir do luns 10 de xuño a través do correo electrónico espeleoloxia@gmail.com.

O prezo da visita guiada é de 30 euros por persoa, incluíndo visita guiada, equipamento (buzo, luvas, casco e lanternas frontais), seguro de responsabilidade civil e seguro de accidentes. As persoas empadroadas en Boqueixón terán un prezo especial de 20 euros por persoa, mentres que a mocidade de 12 a 18 anos desfrutará dunha tarifa de 15 euros por persoa.

O punto de encontro será o aparcadoiro do Pico Sacro. Recoméndase asistir con roupa e calzado cómodos e pechados. Máis información está dispoñible na Federación Galega de Espeleoloxía e no Departamento de Emprego, Formación e Turismo de Boqueixón.