O Concello da Pobra do Caramiñal destinou máis de 220.000 euros á mellora de instalacións deportivas e a axudas a clubs no 2025

O concelleiro Eloy Sobrido reafirmou onte o compromiso do goberno local co “deporte e cos clubs e entidades deportivas do municipio”. Fíxoo nunha conferencia de prensa na que expuxo as principais cifras da área ao longo do presente exercicio. En total, tal e como explicou, destináronse 224.346 euros entre obras, actuacións de mellora e acondicionamento nas instalacións e axudas tanto directas como indirectas a entidades. Tal e como explicou Sobrido, esta cantidade é superior, xa que a isto habería que sumar “as actividades propias que organizamos desde a Concellería, como son a Carreira Popular ou a Milla Nocturna e a colaboración que prestamos para outras citas como, por exemplo, o Torneo Internacional Congalsa”.

Por unha banda, no apartado de novos investimentos, a cifra ascende aos 104.296 euros. Entre os executados no 2025, o edil de Deportes destacou o do campo de fútbol de Alta (38.000 euros), e que supuxo a demolición do muro e o acondicionamento da zona de aparcadoiro. Con todo, o Concello realizou tamén intervencións no campo de Cadreche (21.000 euros) e no da Tomada (uns 3.000 euros).

A Concellería dedicou, ao longo deste exercicio, preto de 40.000 euros ao mantemento das instalacións deportivas. Trátase dunha partida coa que “se actuou en todas as dependencias, procurando que estas estean nas mellores condicións posibles para os usuarios e usuarias”.

Axudas a clubs

Aparte dos investimentos, o concelleiro de Deportes subliñou o “esforzo” que o goberno local realiza, desde os últimos anos, no apartado de axudas. No caso das directas, acadáronse os 61.000 euros. En canto ás indirectas, segundo os cálculos do departamento, a cantidade sería de 20.000 euros dirixidos á compra de trofeos e á disposición e préstamo de servizos para eventos: ambulancias, os baños portátiles, escenarios, etc.

Eloy Sobrido agradeceu o labor que realiza o persoal do departamento de Deportes, que cualificou de “fundamental” e incidiu, ademais, na vontade de “continuar apostando polo noso tecido deportivo, que cumpre unha función esencial no concello”.